Ambasadorët e BE-së do të zhvillojnë një takim urgjent këtë të diel në mbrëmje pasi presidenti amerikan, Donald Trump ka kërcënuar të vendosë tarifa për aleatët që janë kundër kërkesës së tij për marrjen e Groenlandës.
Trump ka thënë se planifikon të rrisë taksat e importit për mallrat nga Danimarka, Norvegjia, Suedia, Franca, Gjermania, Mbretëria e Bashkuar, Holanda dhe Finlanda.
“Një tarifë prej 10% do të zbatohet nga 1 shkurti dhe më vonë mund të rritet në 25%”, ka thënë presidenti amerikan.
Kryeministri i Mbretërisë së Bashkuar, Keir Starmer, ka thënë se kërcënimi i Trumpit është “krejtësisht i gabuar”, ndërsa presidenti francez, Emmanuel Macron, e ka quajtur atë “të papranueshëm”.
Trumpi këmbëngul se SHBA duhet ta zotërojë Groenlandën për sigurinë kombëtare dhe nuk e ka përjashtuar marrjen e saj me forcë.
Drejtuesja e politikës së jashtme të Bashkimit Evropian, Kaja Kallas, ka paralajmëruar Shtetet e Bashkuara se vendosja e tarifave ndaj aleatëve evropianë do t’i shërbejë Kinës dhe Rusisë. Në një postim në rrjetin X, Kallas ka shkruar se Pekini dhe Moska “duhet të jenë të kënaqura”, pasi do të përfitojnë nga ndarja mes aleatëve.
“Nëse rrezikohet siguria e Groenlandës, atëherë mund ta trajtojmë këtë çështje brenda NATO-s,” ka shtuar ajo. “Tarifat rrezikojnë ta bëjnë Evropën dhe Shtetet e Bashkuara më të varfër dhe minojnë prosperitetin tonë të përbashkët”, theksoi Kallas.
