Mbrojtje më e mirë për fëmijët dhe të mbijetuarit e dhunës me bazë gjinore
Një dhomë intervistimi posa e rinovuar dhe plotësisht e pajisur, miqësore dhe e përshtatur për fëmijët dhe viktimat, u inaugurua sot në Sektorin për punë të brendshme në Manastir, duke ofruar një mjedis të sigurt, konfidencial për personat që kanë përjetuar trauma, për zhvillimin e intervistave të ndjeshme me viktima dhe dëshmitarë, përfshirë fëmijët.
E zhvilluar në përputhje me standardet dhe praktikat më të mira ndërkombëtare, ky mjedis i ri do të iu mundësojë punonjësve të policisë dhe profesionistëve nga fusha e drejtësisë penale në zbatimin e një qasjeje të orientuar drejt viktimës dhe të ndjeshme ndaj fëmijëve në rastet e dhunës në familje, dhunës ndaj grave dhe vajzave, trafikimit me qenie njerëzore dhe drejtësisë për të mitur.
Në ceremoninë e hapjes morën pjesë Ambasadori i Suedisë në Maqedoninë e Veriut, Ola Sohlström; Shefi i Misionit të OSBE-së në Shkup, Ambasadori Kilian Wahl; Zëvendësministri i punëve të brendshme, Astrit Iseni dhe Shefi i SPB Manastir, Sasho Mirceski.
Në fjalimin e tij të hapjes, Ambasadori Kilian Wahl theksoi se “viktimave u nevojitet mbrojtje e veçantë dhe një hapësirë e sigurt që do të parandalojë ri-viktimizimin dhe shkaktimin e një trauma të re.”
Ambasadori Ola Sohlström ritheksoi angazhimin e Suedisë për të mbështetur praktikat e policimit të përgjegjshëm dhe të orientuar drejt njerëzve, duke vënë në dukje se hapësira e re pasqyron përkushtimin e Ministrisë ndaj një sistemi drejtësie që i jep përparësi dinjitetit dhe sigurisë të secilit fëmijë.
Zëvendësministri Astrit Iseni riafirmoi marrjen përsipër dhe angazhimin nga ana e Ministrisë që të sigurojë që qasjet e orientuara drejt viktimës të bëhen një standard i pranishëm në të gjitha njësitë policore në mbarë vendin.
Kjo nismë është pjesë e projektit “Mbështetja Suedeze për Reformën Policore në Maqedoninë e Veriut”, që synon forcimin e kapaciteteve institucionale të Policisë së vendit për të zbatuar praktikat më të mira ndërkombëtare dhe standardet e të drejtave të njeriut në fushat e drejtësisë për të mitur dhe policimit në komunitet. Ajo pasqyron partneritetin e fortë ndërmjet Ministrisë, Autoritetit Policor Suedez dhe Misionit të OSBE-së, duke kontribuar në prioritetet kombëtare për reforma, përpjekjet e vendit për integrim në BE dhe përqendrimin e përbashkët në barazinë gjinore, të drejtat e njeriut, zhvillimin e policisë dhe përpjekjet për të parandaluar dhe adresuar dhunën ndaj grave dhe vajzave.
Inaugurimi i dhomës së intervistimit të orientuar drejt viktimave zhvillohet në prag të fushatës globale “16 Ditët e Aktivizmit kundër Dhunës me Bazë Gjinore”, e cila nis javën që vjen. Kjo tregon demonstron se si partneritetet e koordinuara mund të sjellin përmirësime të prekshme për viktimat dhe të mbijetuarit në mbarë Maqedoninë e Veriut.
