Sot pasdite, kryetari i Komunës së Tetovës, Bilall Kasami, vizitoi konakun e mjeshtrit të njohur të çiftelive, Isak Abduramani, në fshatin piktoresk Vicë.
Në punëtorinë e tij, ku çdo tingull i çiftelisë bart shpirtin e trashëgimisë sonë kulturore, Kasami pati mundësinë të njihet nga afër me artin dhe përkushtimin e mjeshtrit. Çiftelia për Isakun nuk është thjesht vegël muzikore, por një frymëzim e trashëgimi që mbetet në zemrat e njerëzve.
“Nën tingujt e çiftelisë, Abduramani ndau kujtime nga periudhat e vështira të jetës, duke treguar dashurinë e tij për tokën, për njerëzit dhe për vlerat e lirisë e drejtësisë, pavarësisht përndjekjeve të regjimit jugosllav”, shkruan Kasami në Facebook.
Kryetari Kasami u shpreh mirënjohës për pritjen dhe theksoi rëndësinë që mjeshtra të tillë i japin ruajtjes së kulturës dhe shpirtit tonë kombëtar.
