Kryetari i Komunës së Tetovës dhe njëri ndër liderët e VLEN-it, Bilall Kasami, ka uruar kryeministrin e Kosovës, Albin Kurtin, për fitoren e jashtëzakonshme në zgjedhjet parlamentare të Kosovës.
Në një status në Facebook, Kasami uroi edhe qytetarët dhe institucionet e Kosovës për, siç tha ai, “vetëdijen e lartë qytetare dhe organizimin e përkryer të zgjedhjeve”.
“Uroj që procesi i formimit të institucioneve të shkojë shpejt e mbarë, duke reflektuar vullnetin qytetar të shprehur sot”, ka shkruar Kasami.
Ai ka theksuar gjithashtu pritshmëritë për vazhdimin e bashkëpunimit ndërshtetëror me qeverinë e re në Kosovë, duke shprehur gatishmërinë për të punuar së bashku me ekzekutivin e ardhshëm të udhëhequr nga Kurti.
Nga numërimi i mbi 90% të votave, Vetëvendosja ka fituar rreth 50% të votës popullore, një fitore që pritet të çojë drejt formimit të Qeverisë Kurti 3 në ditët në vijim.
