Kryetari i Komunës së Tetovës, Bilall Kasami, mori pjesë në panel diskutimin “Zëri i të rinjve në vendimmarrje”, i cili u mbajt në sheshin “Iliria” në Tetovë, në organizim të Forumit Rinor. Në fjalimin e tij, Kasami theksoi se angazhimi i tij mbetet i fokusuar në krijimin e mundësive përmes të cilave të rinjtë mund ta realizojnë plotësisht potencialin e tyre.
Ai përmendi kryesuesin e listës së këshilltarëve, Albi Qamili, si dhe drejtorin e NP “Sharri”, Valon Zeqiri, si dy të rinj të cilëve u është dhënë një shans brenda Komunës së Tetovës. Kasami u bëri thirrje të rinjve të jenë të vetëdijshëm se në momente të caktuara të jetës do të duhet të hartojnë rrugën e tyre.
“Ne përpiqemi t’u ofrojmë mundësi të rinjve dhe tashmë kemi shembuj të shumtë të të rinjve të suksesshëm të cilëve u janë besuar përgjegjësi. Albi është në krye të listës, Valoni është drejtori i një prej kompanive më të rëndësishme – kjo tregon se të punosh me të rinjtë do të thotë të punosh me pjesën më energjike të shoqërisë”, theksoi Kasami.
Kasami theksoi më pas se roli i të rinjve në procesin e vendimmarrjes duhet të jetë në koordinim me brezat më me përvojë.
“Vetëm në këtë mënyrë mund të merren vendime vullnetare, por edhe të menduara mirë, të cilat në fund të fundit sjellin rezultate më të mira. Kur flasim për të rinjtë, flasim për të rinj të arsimuar, të edukuar dhe të përgatitur profesionalisht, të cilët mund të mbajnë përgjegjësitë që u takojnë. Vendimet tuaja do të jenë më të sakta nëse merrni parasysh edhe përvojat e brezave të vjetër. Por në momente të caktuara duhet ta formësoni vetë rrugën tuaj të jetës, në mënyrë që të fitoni përvojë autentike. Vetëm në këtë mënyrë do t’i trashëgoni brezat e vjetër dhe do të bëheni shembull për ata që do të vijnë pas jush”, tha Kasami
