Kryetari i Lëvizjes Besa, Bilall Kasami, njëherësh njëri ndër krerët e VLEN-it, ka folur sot për shkrirjen e koalicionit në një parti. Për këtë, ai ka theksuar se janë në komunikim me të gjithë funksionarët e VLEN-it, duke vlerësuar se çdo anëtar i çdo subjekti politik ka të drejtën e plotë që të japë qëndrimet e tij për rrugëtimin e mëtutjshëm të VLEN-it, që siç tha, të gjejnë rrugën më të shkurt dhe më të mirë që VLEN-i sa më shpejtë të bëhet një subjekt politik.
BILALL KASAMI, KRYETAR I LËVIZJES BESA
“Para se ta përcaktojmë afatin kohor, është që të gjejmë modelin më të mirë dhe të ketë dakordësi të plotë, sepse një ndër sukseset e VLEN-it është që deri tash të gjitha vendimet janë marrë me koncensus të plotë dhe ne nuk duam që edhe në këtë rast të ketë majorizim, edhe pse ka mendime të ndryshme se si do të duhej të duket lidershipi i VLEN-it, ne duam që deri në fundë t’i harmonizojmë qendrimet dhe në fundë të dalim me një qendrim të përbashkët”.
Kasami tha se për çështjen e kryetarit të partisë, po shqyrtohet modeli që të jetë me rotacion. Kujtojmë se nga koalicioni VLEN, disa herë kanë premtuar dhe kanë theksuar se janë duke punuar që sa më shpejtë VLEN-it të bëhet një parti, ndërsa në lidhje se kush do të jetë kryetar, ata në tavolinë i kanë disa opsione.
