Kryetari i Komunës së Tetovës Bilall Kasani, së bashku me Ministrin e Sportit Borko Ristovski dhe zëvendësministren Safije Shahini Sadiki, ndoqën nga afër punimet që po zhvillohen në Qendrën Sportive të qytetit.
Brenda kompleksit sportiv po ndërtohet stadiumi i ri me bar natyral, po riparohen dhe mbulohen tribunat e stadiumit aktual, si dhe po vendoset sistemi i ri i ndriçimit për zhvillimin e ndeshjeve gjatë natës. Në kuadër të këtyre punimeve, po modernizohen edhe zhveshtoret ekzistuese.
“Me këto investime, stadiumi po përshtatet sipas standardeve të Federatës së Futbollit, duke krijuar kushte për zhvillimin e ndeshjeve të Ligës së Dytë vendore”, shkruan Kasami në Facebook.
Kryetari theksoi se në bashkëpunim me Qeverinë do të vazhdojnë investimet në sport dhe infrastrukturë për të rinjtë, duke paralajmëruar se projekte të tjera të rëndësishme do të realizohen në kuadër të “Kapitullit të Dytë” të zhvillimit të Tetovës.
