Kryetari i Komunës së Tetovës, Bilall Kasami, së bashku me bartësin e listës për këshilltarë, Albi Qamili, dhe ministrin e Ekonomisë dhe Punës, Besar Durmishi, zhvilluan një takim me banorët e lagjes “Jashtë Vardarit”.
Banorët shprehën mirënjohjen e tyre për investimet konkrete që tashmë po realizohen në këto lagje. Rrjeti primar i ujësjellësit, me vlerë prej 250 mijë euro, është bërë realitet duke siguruar ujë të pijshëm për çdo familje, ndërsa rikonstruksioni i rrugës me investim prej 120 mijë euro do të nisë javën e ardhshme.
Në takim u dha edhe lajmi i madh për fillimin e punimeve të rrugës që kalon përmes fabrikës “Teteks” dhe lidh daljet kryesore të qytetit për Bërvenicë dhe Falisht, projekt ky në vlerë prej 1.5 milion euro, që pritet të lehtësojë qarkullimin dhe të modernizojë infrastrukturën e Tetovës.
“Këto investime janë dëshmi se Tetova është në rrugën e duhur të zhvillimit. Mirënjohja e qytetarëve na jep forcë që më 19 tetor, bashkë, ta vulosim mandatin e dytë dhe ta hapim kapitullin e ri për Tetovën”, tha kryetari Kasami.
