Kryetari i Komunës së Tetovës dhe njëri nga liderët e VLEN-it, Bilall Kasami, mori pjesë në Forumin e Kryetarëve të Ballkanit Perëndimor në Durrës të Shqipërisë, ku së bashku me kolegë nga rajoni formalizuan krijimin e rrjetit të bashkëpunimit për projekte të përbashkëta.
Ky rrjet ka për qëllim që komunat nga rajoni të bashkëpunojnë për sigurimin e financimit nga Bashkimi Evropian dhe fondet IPA.
“Ky hap i rëndësishëm do të na mundësojë që në të ardhmen të hartojmë projekte të përbashkëta dhe të aplikojmë për fondet e 🇺Bashkimit Evropian dhe për fondet IPA, me qëllim që komunat tona të mbështesin dhe të ndihmojnë njëra-tjetrën në zhvillim”, njoftoi Kasami.
Ai tha Tetova do të jetë gjithmonë pjesë aktive e nismave që sjellin bashkëpunim dhe zhvillim për qytetarët.
Në forum, kryetari Kasami ka prezantuar edhe punën e Tetovës për një qytet të gjelbër dhe të pastër.
“Gjithashtu, pata mundësinë të ndaj me pjesëmarrësit të arriturat e Komunës së Tetovës në fushën e mbrojtjes së mjedisit dhe energjinë e rinovueshme, të cilat mbeten prioritete kyçe për të ardhmen tonë të përbashkët”, publikoi Kasami.
