Situata në FC Shkupi ka hyrë në një fazë kaotike, pasi “Këshilli për shpëtim dhe rikthim të ndershmërisë, dinjitetit dhe identitetit të Klubit Futbollistik Shkupi” ka vendosur të ngrijë të gjitha aktivitetet në dhe rreth klubit, shkruan Zyrtare.net.
Në komunikatën e publikuar, Këshilli sqaron se gjatë ditës së mërkurë, në prag të ndeshjes miqësore me KF Arsimin, është njoftuar nga Bekim Baftijari se ai ka marrë pronësinë e klubit. Ky pretendim është shoqëruar edhe me publikimin e një fotografie nga ish-presidenti Jasin Konjali, ku ky i fundit i uronte Baftijarit “pronësinë” e FC Shkupit.
Megjithatë, sipas Këshillit, dokumenti i prezantuar nga Baftijari nuk përbën dëshmi për transferim të pronësisë apo aksioneve të klubit, por vetëm një autorizim për përfaqësim para institucioneve, i ngjashëm me autorizime që në të kaluarën i kanë pasur edhe drejtues të tjerë ekzekutivë. Sipas tyre, në këtë formë Baftijari mbetet vetëm “person i autorizuar nga ish-presidenti” dhe jo pronar i klubit.
Këshilli shpreh shqetësim serioz për mungesën e transparencës, mungesën e një plani konkret për funksionimin e klubit dhe përplasjen e filozofisë së veprimit me atë të personit të autorizuar. Po ashtu, thuhet se situata ka krijuar huti dhe pasiguri te lojtarët dhe stafi teknik, duke rrezikuar harmoninë e rikthyer me shumë mund brenda ekipit.
Në komunikatë theksohet se ky autorizim shihet si një përpjekje e ish-presidentit Jasin Konjali për të fituar kohë dhe për të mos e dorëzuar klubin “atyre që u takon – qytetarëve të Shkupit”, veçanërisht në prag të fillimit të stinorit pranveror.
Derisa të arrihet një marrëveshje e shkruar dhe e qartë për bashkëpunimin e ardhshëm, Këshilli ka vendosur të ngrijë të gjitha aktivitetet, duke i uruar njëkohësisht “personit të autorizuar nga ish-presidenti” fat dhe sukses në, siç thuhet, “shpëtimin e klubit nga më e keqja”.
