Ish-drejtori i Ndërmarrjes Publike Komunale “Ujësjellësi” në Koçan, një ish-punonjës dhe edhe dy punonjës të tjerë të ndërmarrjes kanë marrë kallëzim penal për keqpërdorim të pozitës zyrtare gjatë një prokurimi publik, me të cilin, sipas pretendimeve, është mundësuar përfitim i kundërligjshëm pasuror në vlerë prej 1.406.306 denarësh, njofton MPB.
Kallëzimi në Prokurorinë Themelore Publike në Koçani është dorëzuar nga Zyra e Jashtme për Punë Kriminalistike pranë SPB Koçani kundër ish-drejtorit të NPK “Ujësjellësi” – Koçan A.K. (44), punonjësve Z.G. (53) dhe B.A. (64), si dhe ish-punonjësit Z.J. (55). Ata dyshohen për veprën penale “keqpërdorim i pozitës dhe autorizimit zyrtar”, e kryer në bashkëkryerje.
Sipas kallëzimit, i dyshuari i dytë si kryetar, ndërsa i treti dhe i katërti si anëtarë të komisionit për prokurim publik, gjatë vitit 2021 kanë zhvilluar procedurë në kundërshtim me Ligjin për Prokurime Publike. Në dokumentacionin e tenderit janë futur specifikime për produkte që, sipas pretendimeve, nuk kanë ekzistuar në treg, duke kufizuar konkurrencën dhe duke favorizuar një operator ekonomik nga një fshat në komunën Mogillë.
I dyshuari i parë, edhe pse kishte detyrim të verifikonte ligjshmërinë e procedurës, ka marrë vendim për zgjedhjen e ofertës më të favorshme dhe ka nënshkruar kontratë në emër të NPK “Ujësjellësi” – Koçan, duke mundësuar, siç thuhet, përfitimin e kundërligjshëm pasuror.
