Ashtu sic u raportua ne mediat italiane, këtë të martë, Luciano Spalletti takoi Shefin Ekzekutiv të Juventusit, Damien Comolli në lidhje me pankinën e klubit bardhezi.
Ish trajneri i Të Kaltërve është në pole position për këtë post, por gjithsesi ende nuk është marrë një vendim përfundimtar, gjë që pritet të ndodhë në orët në vazhdim. Gjatë këtij takimi, Comolli i bëri propozimin Spalletti një kontratë deri në qershor me rinovim automatik të saj në rast kualifikimi për në Ligën e Kampioneve. Nga ana e tij, trajneri Spalletti, ia hapi dyert Juventusit, megjithatë ish trajneri i Napolit nuk e ka diskutuar ende anën financiare të kontratës me bardhezinjtë.
Luciano Spalletti e vlerëson në mënyrë pozitive skuadrën e Juventusit dhe është i bindur se mund të ringjallë ambiciet e një skuadre që për momentin ka si objektiv një vend në Ligën e Kampioneve të sezonit të ardhshëm si dhe arritjen të pakën në playoffin e këtij kompeticioni në këtë sezon. Dyshimi në këtë pikë qëndron sesa mund të ndikojë një trajner që karakterizohet për lojën që aplikon te një skuadër kur e merr drejtimin e saj gjatë zhvillimit të një sezoni. Në të vërtetë edhe te Roma kur zëvendësoi Rudi Garcia, ai ia doli të lërë gjurmën e tij edhe pse shkoi te verdhekuqtë në muajin janar.
Gjithsesi te Juventusi janë të vëmendshëm dhe nuk duan të gjenden të papërgatitur nëse tratativat me Spallettin do të ndërpriten në mënyrë të papritur. Dhe alternativa më logjike në këtë pikë është Raffaele Palladino, që në fakt është kontaktuar nga drejtuesit e Juventusit, me trajnerin që është gati të pranojë një kontratë deri në qershor. Gjithsesi kjo hipotezë për momentin është në plan të dyte.
