Në Dhomat e Specializuara të Kosovës (DhSK) në Hagë po vazhdon edhe sot procesi gjyqësor ndaj ish-krerëve të Ushtrisë Çlirimtare të Kosovës (UÇK), me dëshminë e John Duncan.
Në fillim të dëshmisë, atij i është lëshuar një video e një takimi që ishte mbajtur në mes komandantëve të zonave dhe persona të tjerë nga UÇK-ja ku zhvilloheshin negociatat për Marrëveshjen e Demilitarizimit.
Në pamje duket Kadri Vesli, teksa dëshmitari Duncan pyetet se a e njeh këtë person.
“Me sa më kujtohet mua, është një nga njerëzit me funksione të larta në funksionin policor dhe të zbulimit”, tha ai.
I pyetur si e di një gjë të tillë, ai u përgjigj “Nuk mund ta them dot”.
Më pas, dëshmitarit iu prezantua një fotografi tjetër në të cilën shiheshin katër persona që për tre prej tyre tha se kanë qenë komandantë të zonave, duke përfshirë edhe Rrustem Mustafën-Remin.
