Regjistrimi i parë elektronik për shkollimin e mesëm për vitin shkollor 2025-2026 do të zgjasë nga 14 deri më 17 qershor, ndërsa regjistrimi i dytë është më 30 qershor. Listat përfundimtare të renditjes pas të dy regjistrimeve do të publikohen nga shkollat më 2 korrik. Ashtu si në vitet e kaluara shkollore, nxënësit do të duhet të dorëzojnë dokumentet në letër në shkolla, por po bëhen përpjekje që nga viti i ardhshëm shkollor procesi të digjitalizohet plotësisht.
Për këtë informoi ministrja e Arsimit dhe Shkencës, prof. dr. Vesna Janevska në emisionin “Për ose kundër” në TV Alfa, duke theksuar se konkursi është krijuar në bashkëpunim me komunat.
“Komunat kishin për detyrë të bënin një analizë të tregut të punës dhe të njoftonin Ministrinë e Arsimit dhe Shkencës për kuadrin që u nevojitet. Në bazë të atyre informacioneve e krijuam konkursin, i cili është publikuar në faqen tonë të internetit dhe në mediat e shtypura”, tha Janevska.
Sa i përket dhënies së maturës shtetërore, ministrja informoi se këtë vit një pjesë e nxënësve do të japin provimet në hollat dhe sallat sportive brenda shkollave, ndërsa një pjesë në amfiteatrot e fakulteteve më të afërta, për të siguruar objektivitet më të madh të të gjithë procesit.
Ajo tha se është e domosdoshme të ketë një distancë prej 1.5 metrash midis nxënësve, duke u bërë apel atyre që të mos shqetësohen nga ambienti ku do të japin provimin dhe të fokusohen në përgatitjet.
