Ratko Kapushevski dhe Asmir Jahoski, pronar i kompanisë “Pucko” vazhdojnë të jenë në staxionin e policisë në Kisella Vodë, ndërsa po hetohen për vepër penale “rrezikim të shëndetit të qytetarëve”, si dhe për “mashtrim” pasi kanë blerë dhe shitur mazut të rrezikshëm. Prokuroria ndërkohë thotë se të dyshuarve mund t’u shtohen veprat penale.
Byroja për Siguri Publike sot kishte nisur një aksion të koordinuar ndaj kompanive dhe individëve që kanë blerë mazutin, i cili rrezikon shëndetin e qytetarëve dhe mjedisin.
Bëhet fjalë për një rrjet të ekspozuar të importuesve, të cilët në mënyrë ilegale kanë shpërndarë derivate me origjinë dhe cilësi të dyshimtë, e më pas kanë nxjerrë 10 miliardë denarë përmes marrëveshjeve fiktive të kredisë dhe shërbimeve të ndërmjetësimit.
Përndryshe, këto lëndë djegëse shpesh përmbajnë nivele të larta të sulfurit, metaleve të rënda ose komponimeve të tjera të dëmshme që mund të çojnë në ndotje serioze të ajrit dhe tokës. Sipas raportimeve nga disa institucione, disa mijëra qytetarë humbin jetën çdo vit dhe ndotja konsiderohet si një nga arsyet më të mëdha të emigrimit.
