Izraeli po përgatitet të ndalojë shpërndarjen e ndihmave humanitare nga ajri mbi Qytetin e Gazës dhe të kufizojë hyrjen e furnizimeve në veri, në një masë që synon të detyrojë qindra mijëra banorë të largohen drejt jugut përpara një sulmi të pritur tokësor, raportoi sot transmetuesi shtetëror i Izraelit, Kan, transmeton Anadolu.
Vendimi synon t’u dërgojë mesazh më shumë se 800.000 banorëve se duhet të largohen nga Qyteti i Gazës, tha kanali, duke cituar një zyrtar izraelit të sigurisë i cili ka pretenduar se infrastruktura në jug është gati për të pritur civilët e zhvendosur.
Ushtria pritet të fillojë të lëshojë urdhra evakuimi brenda rreth dhjetë ditësh, thuhet në lajm.
Masa vjen pas urdhrave nga udhëheqja politike e Izraelit për t’i dhënë fund asaj që e ka quajtur “pauzë taktike” në luftimet e përditshme, sipas së cilës gjatë muajit të kaluar ishin lejuar orë të kufizuara për shpërndarjen e ndihmës humanitare.
Kjo pauzë u bë nën presionin ndërkombëtar në rritje për shkak të mungesave të rënda të ushqimit në enklavë.
Kan tha se pauzat e pjesshme do të mbeten në disa zona qendrore dhe në al-Mawasi, një rrip toke në jug ku Izraeli kërkon t’i drejtojë civilët të mblidhen.
Përshkallëzimi përkoi me deklaratën e ushtrisë izraelite se Qyteti i Gazës – shtëpia e gati gjysmës së 2,4 milionë banorëve të territorit – është shpallur “zonë e rrezikshme luftimi”.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
