Izraeli ka kryer një tjetër sulm ajror ndaj një kampi refugjatësh në Gaza, në të njëjtën kohë kur në Nju Jork po zhvillohen përpjekje diplomatike në samitin e Kombeve të Bashkuara.
Sipas agjencisë së lajmeve, disa banesa në kampin e refugjatëve Shati, në qytetin e Gazës, janë shkatërruar pas një sulmi izraelit. Në pamjet nga vendngjarja shihen qytetarë që mbajnë trupa të pajetë në duar, mes rrënojave të ndërtesave të goditura.
Izraeli po e vazhdon ofensivën e tij në qytetin e Gazës, pavarësisht shqetësimeve të komunitetit ndërkombëtar për pasojat ndaj popullsisë palestineze, e cila është kryesisht e zhvendosur nga shtëpitë e saj.
Nga terreni raportohet se civilët janë goditur rëndë dhe situata humanitare po përkeqësohet gjithnjë e më shumë.
Ndërkohë, në Asamblenë e Përgjithshme të OKB-së në Nju Jork, po zhvillohen bisedime mes liderëve botërorë për ndalimin e luftimeve dhe gjetjen e një zgjidhjeje për konfliktin. Deri tani, këto përpjekje nuk kanë arritur të ndalojnë përshkallëzimin e dhunës.
Sulmi në kampin Shati është një tjetër zhvillim i rëndë në këtë konflikt dhe ka shtuar thirrjet për një armëpushim të menjëhershëm dhe mbrojtjen e civilëve.
