Ish-ministri i Punëve të Jashtme të Portugalisë, João Gomes Cravinho, me një video-mesazh shprehu mbështetje të fuqishme për kandidaturën e Bujar Osmanit për kryetar të komunës së Çairit.
“Është kënaqësi e madhe ta mbështes kandidaturën e Bujar Osmanit për komunën e Çairit. E njoh Bujarin si ministër të punëve të jashtme dhe më ka impresionuar jashtëzakonisht,” deklaroi Cravinho.
Cravinho, i cili ka qenë shef i diplomacisë portugeze dhe është diplomat me renome ndërkombëtare, e theksoi rolin e Osmanit si kryesues i OSBE-së dhe udhëheqësinë e tij në çështjet evropiane:
“Kryesimi i tij me OSBE-në, udhëheqësia e tij në çështjet evropiane, mençuria e zërit të tij, të gjitha këto tregojnë se Çairi ka një mundësi shumë të mirë nëse Bujari bëhet kryetar komune.”
Në mesazhin e tij, ai nënvizoi se me Bujar Osmanin në krye të Çairit, komuna do të fitojë një njeri që do të dijë të hapë dyer të rëndësishme për bashkëpunimin dhe zhvillimin ndërkombëtar.
“Besoj se me Bujarin do të jetë shumë më e lehtë të hapen të gjitha dyert ndërkombëtare që duhet të hapen. Me Bujarin, e ardhmja e Çairit është një e ardhme e buzëqeshur,” theksoi Cravinho.
