Zëvendësministri i Punëve të Brendshme, Astrit Iseni përmes një reagimi sqaron se spërkatja me ujë të shenjtë nga një zyrtar fetar mbi automjetet zyrtare të policisë dhe mbi objektet zyrtare, brenda parkingut të MPB-së, “nuk përbën akt besimi privat, por shkelje të drejtpërdrejtë të parimit të shtetit laik dhe të ligjit”.
Ky veprim, sipas tij, është kryer nga disa punonjës të një njësie të policisë rrugore, në bashkëpunim me klerikun fetar dhe në asnjë mënyrë nuk përfaqëson qëndrimin apo veprimtarinë institucionale të MPB-së.
Njëkohësisht, thekson ai, ky rast dëshmon për mungesë të vetëdijes profesionale te disa pjesëtarë të policisë.
Kushtetuta e Republikës së Maqedonisë së Veriut (neni 19) përcakton qartë ndarjen e fesë nga shteti dhe Ligji për policinë, thotë Iseni, kërkon neutralitet të plotë dhe të pakushtëzuar.
“MPB është institucion shtetëror që duhet t’u shërbejë të gjithë qytetarëve pa dallim feje. Hapësirat dhe mjetet zyrtare nuk janë pronë e asnjë besimi fetar dhe nuk guxojnë të përdoren për rituale apo veprime fetare. Policia është në shërbim të të gjithë qytetarëve dhe nuk mund të veprojë me standarde të dyfishta”, thekson Iseni.
Sipas tij, institucioni i MPB-së ka rregullore të qarta dhe në përputhje me to, siç thekson do të thirren në përgjegjësi të gjithë ata që: kanë organizuar ose kanë lejuar këtë veprim; nuk e kanë parandaluar atë; kanë lejuar hyrjen e klerikut fetar në objektet e MPB-së për kryerjen e veprimeve fetare.
“Vetëm përmes zbatimit konsekuent të ligjit dhe barazisë para tij mund të rikthehet besimi i qytetarëve dhe i të punësuarve në këtë institucion. Respekti për fenë është i domosdoshëm, por përzierja e fesë me institucionet e sigurisë është e papranueshme dhe e rrezikshme për barazinë, neutralitetin institucional dhe besimin qytetar. Shteti është laik. Policia është e qytetarëve. Ligji është mbi çdo simbol fetar”, ka thënë mes tjerash zv/ministri Iseni.
