Irani ka marrë një propozim me 15 pika nga SHBA për arritjen e një armëpushimi, kanë bërë të ditur dy zyrtarë pakistanezë.
Plani përfshin lehtësim të sanksioneve, kufizim të programit bërthamor dhe raketor të Iranit, mbikëqyrje ndërkombëtare, si dhe garantimin e qarkullimit në Ngushticën e Hormuzit. Zyra e ministrit të Jashtëm të Iranit, Abbas Araghchi, tha se ai ka diskutuar këtë javë për luftën me disa homologë të tij, por Mohammad Bagher Qalibaf, kryetari i Parlamentit të Iranit, e mohoi pretendimin e Trump për bisedime të drejtpërdrejta, ndërsa një zëdhënës ushtarak iranian deklaroi se luftimet do të vazhdojnë.
Ushtria e SHBA-së po përgatitet të dislokojë të paktën 1000 trupa nga Divizioni i 82-të Ajror në Lindjen e Mesme në ditët në vijim, sipas tre burimeve në dijeni të planit, të cilët folën në kushte anonimiteti për shkak të ndjeshmërisë së çështjes.
Sipas AP, një zyrtar egjiptian e cilësoi propozimin si bazë për negociata të mëtejshme, ndërsa ndërmjetësit po përpiqen të organizojnë një takim mes palëve, që mund të mbahet së shpejti në Pakistan, ndoshta të premten, përcjell KosovaPress.
Ndërkohë, SHBA po dërgon trupa në Lindjen e Mesme, ndërsa Irani ka vijuar sulmet në rajon, përfshirë një incident në aeroportin e Kuvajtit.
Përshkallëzimi i situatës dhe tensionet në Ngushticën e Hormuzit kanë rritur çmimet e naftës dhe shqetësimet për një krizë globale energjetike.
