Investimet e bizneseve të Kosovës në Shqipëri janë rritur ndjeshëm në dy vitet e fundit, ndërsa kompanitë kërkojnë tregje më të qëndrueshme dhe potencial rritjeje në sektorin e pakicës, shërbimeve dhe pasurive të paluajtshme, përcjell Monitor.al.
Në mars 2025, zinxhiri kosovar Viva Fresh Store bleu rrjetin SPAR Albania nga grupi BALFIN për 36.4 milionë euro, sipas të dhënave të Qendrës Kombëtare të Biznesit. Blerja u mbështet nga një hua deri në 25 milionë euro nga BERZH dhe ENEF II, financimi më i madh që BERZH ka dhënë ndonjëherë për një kompani nga Kosova. “Viva Fresh” synon zgjerim në tregun shqiptar përmes hapjes së dyqaneve të reja.
Në shtator 2025, Albi Holding bleu Fashion Group Albania për 7.6 milionë euro, duke marrë kontrollin e një rrjeti markash ndërkombëtare si Mango, Geox, Timberland, Hugo Boss dhe të tjera.
Më 2025, kompania kosovare KAN, që operon 35 restorante në rajon, mori kontrollin e KFC Shqipëri nga “Global Fast Food Albania”, e cila mbylli vitin 2024 me xhiro 1.44 miliardë lekë dhe fitim 141 milionë lekë. KAN planifikon hapjen e 20 pikave të reja të KFC në gjithë vendin.
Sipas Bankës së Shqipërisë, investimet nga Kosova në Shqipëri arritën 96 milionë euro në 2024, nga vetëm 13 milionë euro në 2019-n. Në gjysmën e parë të 2025-s, fluksi arriti 63 milionë euro, me 582 kompani aktive me kapital nga Kosova në fund të 2024-s.
Ekspertët thonë se rritja vjen nga kombinimi i një tregu shqiptar më dinamik, i nxitur nga turizmi, dhe klimës së pasigurt të biznesit në Kosovë.
Afaristi Ramiz Kelmendi, pronar i ELKOS/ETC, thotë se Kosova po kalon një periudhë të pasigurt politike dhe institucionale, duke frenuar investimet. “Nuk ka stabilitet dhe siguri. Disa biznese po zgjerohen në Shqipëri, ndërsa të tjerat po zhvendosen plotësisht,” tha ai për Monitor.
Sipas Dhoma e Tregtisë dhe Industrisë së Kosovës, rritja e çmimeve të energjisë, vonesat ligjore dhe vendimet pa konsultim me biznesin kanë shtuar presionin mbi sipërmarrësit. Ndërkohë, tregu shqiptar po tërheq gjithnjë e më shumë kompani prodhimi, shërbimi dhe ndërtimi.
Eksperti i pasurive të patundshme Muhamet Bytyqi tha se tregu i ndërtimit në Kosovë është ngopur, ndërsa Shqipëria ofron kërkesë të lartë, veçanërisht nga të huajt dhe diaspora./Monitor.al
