Deputetja e koalicionit VLEN, Imerlije Saliu, ka reaguar lidhur me skandalin që ka ndodhur në fshatin Sllupçan, të komunës së Likovës, ku një e mitur dyshohet se është abuzuar seksualisht.
“Si deputete, mbi të gjitha si nënë, e dënoj me dhimbje dhe me ashpërsinë më të madhe aktet e rënda dhe të neveritshme të abuzimit seksual dhe shantazhit ndaj një të miture nga fshati Sllupçan, Komuna e Likovës.
Ky rast është tronditës dhe prek ndërgjegjen e çdo prindi dhe çdo qytetari. Në raste të tilla, toleranca është zero ndaj çdo forme të dhunës seksuale, veçanërisht kur ajo ushtrohet ndaj fëmijëve.
Mbështes veprimet e menjëhershme të Policisë dhe pres që Prokuroria Publike të veprojë me urgjencë, vendosmëri dhe profesionalizëm për të sjellë para drejtësisë të gjithë përgjegjësit, pa asnjë kompromis. Asnjë krim i tillë nuk guxon të mbetet i pandëshkuar.
Mbrojtja e fëmijëve është detyrim kushtetues dhe ligjor i shtetit dhe i çdo institucioni. Heshtja përballë këtyre krimeve është shkelje e së drejtës themelore të fëmijës për siguri dhe mbrojtje.
Si shoqëri, duhet të rrisim vetëdijen se secili prej nesh ka përgjegjësi të raportojë çdo dyshim apo rast të tillë, sepse vetëm përmes zbatimit të ligjit dhe reagimit të menjëhershëm mund të mbrojmë fëmijët tanë dhe të rikthejmë besimin në drejtësi”, ka shkruar Saliu.
