Një atmosferë madhështore mbizotëroi sonte në sallën “Boris Trajkovski”, ku njëri nga liderët e VLEN, Zeqirija Ibrahimi, mbajti një fjalim emocionues dhe plot krenari para mijëra të pranishmëve.
Duke iu drejtuar qytetarëve, Ibrahimi theksoi se VLEN është lëvizja që në vetëm 15 muaj ua ka rikthyer shqiptarëve krenarinë dhe dinjitetin e mohuar për dekada.
“Sonte jam në këtë skenë që t’ju flas me zemër si VLEN, si shqiptar, si besimtar dhe si dikush që askujt asnjëherë nuk i ka thënë ‘zagar’. Unë i takoj subjektit që shqiptarët i bëri krenarë. Po, jam shumë krenar që nuk vijë në skenë për ta keqpërdorur shqiponjën”, tha Ibrahimi mes duartrokitjeve frenetike.
Ai kujtoi disa nga arritjet madhore të qeverisjes së re: miratimin e Ligjit për Përfaqësim të Drejtë dhe Adekuat, zyrtarizimin e Medresesë Isa Beu, ndarjen e miliona eurove për komunat shqiptare, 2.300 të punësuar shqiptarë dhe 700 të avancuar nëpër institucione.
“Ky është avancimi i drejtë dhe adekuat. VLEN nuk është vetëm projekt fushate – VLEN është projekt i kombit shqiptar”, u shpreh Ibrahimi.
Në fjalimin e tij, ai theksoi gjithashtu mbështetjen për kandidatët e VLEN-it në të gjitha komunat shqiptare. “Jam krenar që në këtë betejë jam bashkë me Izetin sepse e dua Çairin e urbanizuar, me Bilallin sepse e dua Tetovën e zhvilluar, me Dautin e Haraçinës, Fetiun e Bogovinës, Nexhmedinin e Likovës dhe Bashkimin e Shkupit”.
