Lideri i Alternativës, Zeqirija Ibrahimi, në podcastin Fol në TV Festa dhe Tv Uskana e Kërçovës, ka folur detajisht edhe për empatinë e palogjikshme të Taravarit ndaj gjendjes së BDI-së.
Sipas Ibrahimit, Taravari haptas ndjente keqardhje për gjendjen e mjerueshme të BDI-së.
Sipas tij, në të gjitha anketat dukej qartë se VLEN-i e fiton bindshëm BDI-në në të gjitha komunat, por Taravari palogjikshëm u vu në shërbim të BDI-së.
“ Nuk është se nuk ka pasur informacione tek-tuk dhe ne kishim, d.m.th. e kemi biseduar sa kemi qenë bashkë, për neve ka qenë indikativë shumë kur e kemi marrë vesh që zoti Taravari mban komunikim të hapur me zotin Ahmeti, me kryetarin e Bashkimit Demokratik për Integrim. Dhe kur ne e kemi pyetur a është e vërtetë ai e ka pohuar që është e vërtetë. Dhe madje ka shfaqur empati për të me keqardhje se duhet t`i ndihmohet atij. Që për neve ka qenë shumë shqetësuese kjo. Për shkak se, ne nuk kemi armiqësi vëlla-vrasëse me zotin Ali Ahmeti, por kemi oponencë politike ngase ne gjykojmë që ai është kryefajtori i gjendjes së shqiptarëve në këto njëzet vitet e fundit.
Andaj kur dikush nga VLEN-i mund të mbaje raporte me të për neve ka qenë shumë shqetësuese. Ajo që na ka bërë të shqetësohemi ishte fakti që ne në të gjitha sondazhet që i kishim edhe atë jo vetëm ne, por edhe VMRO-ja, por jam i sigurt se ato i ka pasur edhe BDI-ja për shkak të kësaj që ndodhi gjithkush ishte i sigurt se VLEN-i në zgjedhjet e ardhshme lokale e fiton BDI-në bindshëm në çdo komunë. Dhe tash ti jepet një gomë e shpëtimit të asaj BDI-e që po fundoset e cila gjithnjë e më shumë e ka frikën se kush e ka radhën të arrestohet për shkak të korrupsionit, të dal dikush nga VLEN-i e ta shpëtoj. Kjo është shumë indikativë për çfarë shtytje për çfarë motive e bënë këtë? Dhe ne jemi shumë të shqetësuar, unë jam akoma edhe sot i shqetësuar dhe nuk kam shpjegim të saktë se çfarë e shtyri zotin Taravari që duke qenë në pozitën e fitimtarit së bashku me partitë e tjera të VLEN-it, ai t`i bëjë aso shërbimi BDI-së?! ”, deklaroi midis tjerash Ibrahimi.
