Një nga eksponentët e lartë të VLEN, Zeqirija Ibrahimi në emisionin “Dialog te Lajmi” ka shpjeguar kërkesën apo modelin e unifikimit të VLEN si një parti.
“Kërkesa e ime që kam ofruar si model është që përveç organeve të zakonshme të Kongresit, kuvendit, kryesisë të ketë edhe një presidencë 4 anëtarëshe, ku ata janë si të thuash organi më i fuqishëm vendimmarrës në subjekt dhe aty janë edhe kryetari, zëvendëskryetari dhe sekretari i përgjithshëm dhe kryetari i kuvendit”, thotë Ibrahimi.
Dhe pastaj një çështje më formale, siç thotë ai është puna se si do merremi vesh për punën e lidershipit, a do mbetet ai për katër vite, a do jetë me rotacion çdo vit, a do t’i ndërrojnë vendet edhe të tjerët që janë pjesë e presidencës.
“Në kohë që kemi arritur në këtë fazë, mundësinë e bërjes së VLEN si një subjekt i përbashkët, unë mendoj se 90 përqindëshin e punës e kemi bërë, dmth tash duhet të vendosin organet e partisë që të bëhet një Kongres i përbashkët me pjesëmarrje të barabartë dhe të themelohen ato organe deri në shkallën e presidencës”, thekson ai.
Gjithsesi, shton ai, nuk është aq e lehtë dhe duhet të jemi koshientë për këtë, sepse siç shton, “janë 4 parti që u bënë bashkë në kushte emergjente elektorale dhe nuk është aq e thjeshtë që ato të shkrihen dhe të integrohen aq lehtë”.
Insistoj dhe këmbëngul që VLEN të bëhet bashkë
Ai më tej shprehet: Jo vetëm që besoj se VLEN do bëhet bashkë, por unë insistoj dhe këmbëngul që VLEN të bëhet bashkë.
Sepse siç shton, shqiptarëve në Maqedoninë e Veriut nuk u lejohet që VLEN të mos bëhet bashkë, nuk e kemi luksin që të kthehemi edhe një herë në istikamet tona të partive.
“VLEN është dëshmuar si një projekt i suksesshëm dhe kjo do duhet të formalizohet”, ka thënë ai.
