Kryetari i Alternativës dhe njëri prej liderëve të VLEN, Zeqirija Ibrahimi, gjatë bërjes së homazheve në varrezat e dëshmorëve të Lubotenit, ka theksuar se Lubotenit i ka borxh krejt shteti, pasi që padrejtësisht u vranë 10 civil shqiptarë.
“Me keqardhje, po edhe me krenari, po vimë për ti vizituar dëshmorët të cilët me 12 gusht të vitit 2001 u vranë në mënyrë të padrejtë nga forcat policore të shtetit. Ajo që më duhet ta theksoj në këtë rast është se derisa akoma ka hezitim se a duhet të vlerësohet UCK ose jo, në këtë vend e kemi argumentin më të mirë se këta njerëz që u vranë nuk ishin nën uniformë të UCK së, por ishin civil edhe shteti erdhi edhe i vrau nëpër shtëpitë e tyre. Sot e ka obligim që në këtë varrezë të vijnë jo vetëm shqiptarët, dhe jo vetëm ne, por të gjithë eksponentët e këtij shteti. Për shkak se, fshatit tonë i ka borxh cdokush në këtë shtet, për shkak se u vranë civilët në mënyrë të padrejtë. Ky nuk është konstatim vetëm i joni, por është konstatim edhe i Tribunalit të Hagës. Andaj sa i kemi borxh si bashkëfshatarë, sa i kemi borxh si shqiptarë, i kemi borxh si qeveritar”, deklaroi Ibrahimi.
