Kompania hungareze e telekomunikacionit “4iG” pritet të bëhet operatori i tretë mobil në Maqedoninë e Veriut, por kjo do të vendoset pas shpalljes së tenderit që pritet të finalizohet muajt e ardhshëm, përcjell INA.
Nga Agjencia për Komunikime Elektronike (AKE) paralajmërojnë se së shpejti do të hapet dëgjesa publike për hyrjen e operatorit të tretë të telefonisë mobile, që më pas të vijojnë procedurat e tjera.
“Pas letrës së qëllimit nga kompania 4iG për të hyrë në treg, hapi i radhës në përputhje me Ligjin për komunikime elektronike është hapja e dëgjesës publike në mënyrë që të gjitha palët e interesuara të shprehin qëndrimin e tyre. Nga rezultati i dëgjimit publik do të dihet nëse do të inicohet një procedurë e tenderit publik apo një procedurë publike me tender publik”, njoftuan nga AEK.
Por në tenderin që do hapet a do jetë vetëm kompania hungareze, apo do ketë interesim edhe nga operatorë tjerë.
Kompania hungareze 4iG në tetor 2024 regjistroi në Shkup kompaninë përfaqësuese “One Macedonia Telecommunications” me adresën e zyrës avokatore “Mihajloski & Popovska”, ku bashkëthemelues është avokati Aleksandar Mihajloski.
“Pas disa blerjeve të suksesshme në Shqipëri dhe Mal të Zi, 4iG Group filloi përgatitjet për të hyrë në tregun e Maqedonisë së Veriut, me themelimin e filialit “One Macedonia Telecommunications”. Me vendimin e Bordit të Grupit, kompania e re do të themelohet nga Antenna Hungária Zrt., pjesë e 4iG Group, në kuadër të së cilës është portofoli i telekomunikacionit të grupit të info-komunikimit në Hungari dhe në Ballkanin Perëndimor. Regjistrimi i kompanisë ka përfunduar dhe me themelimin e kësaj kompanie, 4iG Group synon që sa më shpejt të hyjë në tregun e telekomunikacionit në Maqedoninë e Veriut”, thuhej në njoftimin e kësaj kompanie.
Drejtor i përfaqësisë në Shkup figuron Tamas Tabori, i cili është zëvendësdrejtor ekzekutiv përgjegjës për strategjinë e telekomunikacionit në kompaninë amë hungareze.
Hyrja e kësaj kompanie u mundësua me nënshkrimin e Memorandumit për mirëkuptim dhe interesim të ndërsjellë të Maqedonisë së Veriut dhe kompanisë hungareze “4IG” për liberalizimin e rrjetit të telekomunikacionit. Kjo marrëveshje u nënshkrua në shtator të vitit të kaluar.
Zëvendëskryeministri dhe ministri i Transportit, Aleskandar Nikolovski, në një deklaratë për media tha se zyrtarizimi i interesit për hyrje në treg nga 4iG Group do të nënkuptojë fundin e duopolit të dy operatorëve celularë në vend dhe uljen e çmimeve për shërbimet celulare.
