Në kuadër të Forumit Ministror për Korridorin 8 në Tiranë, ministri i Mjedisit Jetësor dhe Planifikimit Hapësinor, Muamet Hoxha, realizoi takim me ministrin e Mjedisit Jetësor të Republikës së Shqipërisë, Sofjan Jaupaj.
Ministri Hoxha në takim theksoi rëndësinë e koordinimit të përbashkët në mbrojtjen e zonave ndërkufitare dhe në zbatimin e standardeve evropiane për ruajtjen e biodiversitetit dhe përballimin e sfidave klimatike.
Ai nënvizoi se bashkëpunimi rajonal është kyç për sigurimin e zhvillimit të qëndrueshëm dhe për përshpejtimin e integrimit evropian të vendeve të rajonit.
Në takim u diskutua për forcimin e bashkëpunimit ndërmjet dy vendeve në fushën e mbrojtjes së mjedisit jetësor, menaxhimit të burimeve natyrore, trajtimit të mbeturinave, si dhe për avancimin e projekteve të përbashkëta në kuadër të agjendës së gjelbër evropiane.
Ministri Jaupaj shprehu gatishmëri për thellimin e partneritetit institucional dhe për realizimin e iniciativave konkrete që do të kontribuojnë në përmirësimin e cilësisë së mjedisit jetësor dhe të jetës së qytetarëve në të dy vendet.
Dy ministrat ranë dakord që bashkëpunimi të intensifikohet përmes shkëmbimit të përvojave, projekteve të përbashkëta dhe koordinimit në forume rajonale dhe ndërkombëtare, me qëllim mbrojtjen e mjedisit jetësor dhe promovimin e zhvillimit të qëndrueshëm në rajon.
