Kryetari i Aleancës për Ardhmërinë e Kosovës, Ramush Haradinaj, ka deklaruar se presidentja Vjosa Osmani ka treguar mungesë respekti ndaj partive që përbënin shumicën shqiptare në kërkesën e tyre për caktimin e datës së zgjedhjeve më 21 dhjetor, ndërsa vendimin e saj e ka harmonizuar me qëndrimet e Vetëvendosjes.
Në një intervistë për Klan Kosova, Haradinaj tha se Osmani ka hyrë edhe në tema që, sipas tij, nuk i takojnë asaj, si interpretimet për diasporën, terma partiake dhe debatet ndërmjet subjekteve politike.
“KQZ është institucion që ekziston vetëm për zgjedhje, nuk ka punë tjetër dhe e obligon ligji. Ata e dinë që zgjedhjet mund të shpallen në çdo kohë për 30 ditë. E luta Presidenten që ta ketë këtë mirëkuptim; ne jemi shumica parlamentare shqiptare. Ata që nuk i patën votat për qeveri kërkuan 28-in, ndërsa ne shumica kërkuam 21-in. Fitoi VV, Vjosa u dha të drejtë. Flet vetë data, ajo e ka pasur mundësinë me vlerësu palën tjetër dhe arsyetimet tona. Ne kemi përvoja dhe dimë; ka mundur me na respektu si opozitë e shumicë. Sepse ne jemi shumica, por presidentja nuk na respektoi,” u shpreh Haradinaj.
Ai shtoi se Osmani “nuk duhet me u lëshu në ato interpretime” dhe se ka bërë “një lëshim të panevojshëm”
“Ka mujt me thënë që diskrecioni është i imi, e jo me hy në debate mes partive, se nuk është temë e saj”, përfundoi Haradinaj.
