Tre herë më shumë raste gripi këtë vit krahasuar me vitin e kaluar. Në javën e parë të këtij viti janë regjistruar 1, 725 raste të gripit, që paraqesin një rritje prej 2.2 për qind krahasuar me javën e kaluar dhe 5.2 për qind më shumë në raport me sezonin e kaluar.
Incidenca më e lartë është vërejtur te fëmijët e moshës 5 deri në 14 vjeç. Drejtoresha e Institutit të Shëndetit Publik, Marija Andonovska, deklaroi se aktualisht në vend po qarkullon me intensitet të lartë virusi i gripit, kryesisht i tipit Influenca A, ndërsa kulmi i rasteve pritet të arrihet në gjysmën e dytë të janarit dhe në gjysmën e parë të muajit shkurt.
“Duhet të theksojmë se në Dibër është shënuar aktivitet shumë i lartë i gripit, në Tetovë dhe Veles është shënuar aktivitet i lartë i gripit, aktivitet i mesëm i gripit është regjistruar në Shkup, Kumanovë, dhe në Shtip, ndërsa në 10 njësi është shënuar aktivitet sezonal i rregullt, ndërsa në dy njësi siç është Radovish dhe Demir Hisar është shënuar aktivitet i ulët i gripit”, tha Marija Andonovska, drejtoreshë e Institutit të Shëndetit Publik.
Andonovska nuk përjashton mundësinë që për shkak të kësaj situate të rekomandohet edhe vazhdimi i pushimit dimëror për nxënësit.
“Ne tani kemi vërejtur se ka rritje, por kjo sipas neve është e pritshme për këtë periudhë. Sigurisht që do të vazhdojmë si Institutit të ndjekim nëse ka rritje edhe në të ardhmen. Nëse vlerësojmë se numrat janë shumë të lartë ne mund të japim si rekomandim që të sjellët ndonjë masë që do të mund ta prolongojë… të paktën do japim rekomandim, më pas do shohim se çfarë do të vendoset”, u shpreh Marija Andonovska, drejtoreshë e Institutit të Shëndetit Publik.
Nga Instituti i Shëndetit Publik apelojnë tek qytetarët që të respektojnë me përpikëri rekomandimet për mbrojtje nga virusi i gripit, duke theksuar rëndësinë e higjienës personale, shmangies së kontakteve të panevojshme, ajrosjes së rregullt të hapësirave dhe paraqitjes tek mjeku në rast të shfaqjes së simptomave./
