Koalicioni VLEN rrezikon të mbetet pa asnjë ndërmarrje publike në kuadër të Qytetit të Shkupit. Derisa kryetari i Qytetit të Shkupit, Orce Gjorgjievski ditë pas dite emëron drejtorë të ndërmarrjeve, për VLEN-in ende nuk është e qartë se cilat ndërmarrje do i takojnë si partnerë të koalicionit. Madje për këtë çështje, dy taboret nuk kanë pasur as marrëveshje paraprake zyrtare. Nga VLEN për Alsat thonë se nuk e kuptojnë Gjorgjievskin pse ngutet me emërimin e drejtorëve qoftë edhe thjeshtë si ushtrues detyre e që ndërkohë, negociatat ende nuk kanë përfunduar.
:Në Qytetin e Shkupit po shohim një nxitim me emërimet, edhe pse bëhet fjalë për ushtrues detyre, ndërsa negociatat ende nuk kanë përfunduar. Ne në VLEN nuk funksionojmë me logjikën “kush e zë i pari karrigen”. Pozicionet që do të udhëhiqen nga VLEN janë pjesë e një procesi që po zhvillohet me kujdes nga grupet e punës. Më mirë të marrim një vendim të saktë pak me vonesë se sa të nxitojmë në një përgjegjësi që ka ende procese për t’u qartësuar”, thonw nga VLEN.
Gjorgjievski deri tani ka emëruar ushtrues detyre në Higjienën Komunale, në Rrugë dhe Rrugica, Ujësjellës e Kanalizim, NQP Shkup, Drislla dhe Parkingun e Qytetit. Pa drejtorë të ri deri tani kanë mbetur vetëm “Parqe e Gjelbërime” dhe “Llajka”. Megjithatë siç mëson Alsat, ka mundësi që Gjorgjievski të mos i jep VLEN-it as këto dy ndërmarrje pasi nuk ka qenë i kënaqur nga mbështetja e tyre në zgjedhjet lokale, veçanërisht në rrethin e dytë. Tentuam të kontaktojmë Gjorgjievskin por nuk ishte i kapshëm. Por pak ditë para zgjedhjeve, Gjorgjievski njoftoi se me VLEN-in do të veprojnë së bashku.
“Gjithsesi se si partner koalicioni z.Izeti është mbështetje e fuqishme për mua periudhën e fundit dhe si partnerë do të veprojmë edhe në menaxhimin e kryeqytetit”, tha Orce Gjorgjievski – Kryetar i Shkupit.
Para se të ndryshojë pushteti lokal, me ndërmarrjet publike nën qytetin e Shkupit, partitë shqiptare kanë menaxhuar gjithmonë me së paku dy prej tyre, kryesisht me Higjienën Komunale dhe me Parqe e Gjelbërime.
Gjorgjievski në N.P Parkingu i Qytetit ka emëruar Vlladimir Kronevskin të cilin VMRO-DPMNE para tre viteve e akuzonin se si ndihmës drejtor ka siguruar mbi 400 parkingje falas për funksionarë të pushtetit. Në “Rrugë dhe Rrugica” është emëruar Boris Nastov i cili në këtë post ishte edhe në fillim të mandatit të Danella Arsovskës. Në Ujësjellës e Kanalizim është emëruar Ivan Mitrovski, zv.kryetar i deritanishëm i komunës së Kisella Vodës. Në NQP Shkup, Sashe Ilievski, i punësuar në ndërmarrje për shumë vite. Në Higjienën Komunale u emërua Dragi Mitkovski ndërsa në Drislla – Stevçe Trpkovski, ish kryetar i Sopishtes./ Alsat.mk
