Tottenham Hotspur hyn në përballjen e Ligës së Kampionëve ndaj Borussia Dortmund me një situatë të paqartë në pankinë, pasi Thomas Frank ka ende shumë gjasa të shkarkohet pas kësaj ndeshjeje. Burime pranë klubit bëjnë të ditur se, edhe pse vendimi është shtyrë për shkak të rrethanave të vështira të skuadrës, kjo mund të jetë paraqitja e fundit e tij në krye të Spurs.
Gjendja e ekipit ka qenë një faktor kyç në vonesën e vendimit, me Frankun që ka pasur në dispozicion vetëm një numër minimal lojtarësh për shkak të lëndimeve, pezullimeve dhe mungesave të tjera. Brenda bordit ka pasur mendime se shkarkimi duhej të kishte ndodhur më herët, por drejtori ekzekutiv Vinai Venkatesham ka qenë mbështetësi kryesor i trajnerit gjatë kësaj periudhe.
Sipas informacioneve, një njoftim për të ardhmen e Frankut mund të vijë që të mërkurën, ndërsa si zgjidhje e përkohshme përmendet Johnny Heitinga. Paralelisht, klubi po shqyrton opsione afatgjata të profilit të lartë si Mauricio Pochettino dhe Xavi Hernandez, në përpjekje për ta rikthyer Tottenhamin në nivelin më konkurrues.
