Qeveria gjermane po përgatitet për një ligj të ri në mbrojtje. Ministri gjerman i Mbrojtjes, Boris Pistorius, përsëriti qëndrimin e tij se shërbimi ushtarak fillimisht do të bazohet në pjesëmarrjen vullnetare.
Ai theksoi se ky vendim është i domosdoshëm për shkak të qëndrimit agresiv të Rusisë.
“Bundesëehr-i duhet të rritet, situata e sigurisë ndërkombëtare, mbi të gjitha qëndrimi agresiv i Rusisë, e bën këtë të domosdoshme. Nuk na duhet vetëm një forcë e pajisur mirë, por jemi tashmë në rrugën e duhur për ta arritur këtë. E kemi bërë këtë për dy vjet e gjysmë dhe nuk do të ndalemi. Vetëm atëherë parandalimi në tërësi do të jetë vërtet i besueshëm përballë Rusisë”.
Nga viti i ardhshëm të gjithë të rinjtë do të marrin një pyetësor nga ushtria gjermane.
Meshkujt duhet t’i përgjigjen kërkesës, ndërsa vajzat sipas dëshirës. Kancelari gjerman Friedrich Merz është shprehur optimist në lidhje me këtë plan që sipas tij është i domosdoshëm për shkak të kërcënimit nga agresioni rus.
“Rusia është dhe do të mbetet kërcënimi më i madh për lirinë, paqen dhe stabilitetin në Europë për një kohë të gjatë. Qeveria gjermane po i përgjigjet kësaj me vendosmëri.”
Aktualisht Bundeswehri gjerman ka 182 mijë ushtare e ushtarë, por ka nevojë për 60-80 mijë ushtarë të rinj shtesë.
