Në Akademinë Ushtarake “Gjeneral Mihajlo Apostolski” u mbajt ceremonia solemne e betimit të klasës së 29-të të kadetëve. Në total, betimin e dhanë 59 kandidatë, me ç’rast ata zyrtarisht e filluan arsimin e tyre ushtarak. Pjesë e Akademisë do të jenë edhe pesë kadetë nga Bosnja e Hercegovina dhe dy nga Mali i Zi.
“Si oficerë të ardhshëm të ushtrisë maqedonase, por edhe të ushtrisë së NATO-s, nga ju pritet të respektoni dhe të praktikoni standardet më të larta profesionale dhe morale në përballje me të gjitha llojet e kërcënimeve — tradicionale, por edhe asimetrike e hibride, në hapësira të ndryshme: fizike dhe kibernetike. Por, nuk duhet të neglizhoni apo të harroni vlerat etike dhe morale, nëse dëshironi të mbeteni njerëz dhe personalitete”, tha Siljanovska Davkova.
“Kjo ditë, kur e jepni betimin solemn, do të mbetet përgjithmonë e gdhendur në kujtimet tuaja, sepse dhënia e betimit është një premtim ndaj shtetit, ndaj më të dashurve tuaj dhe më e rëndësishmja – një premtim ndaj vetes. Uniforma që sot e mbani me krenari le t’ju kujtojë gjithmonë përgjegjësinë dhe vlerat që mbroni, sepse nga sot ju i përkisni një familjeje të madhe ushtarake”, u shpreh Misajllovski.
