Gazetari Abedin Bilalli nga Gostivari ka njoftuar largimin e tij nga Televizioni lokal Globi dhe vendimin për të marrë rrugën e mërgimit, duke e ndarë këtë kapitull përmes një letre publike.
Porosai e plotë publike e gazetarit Abedin Bilalli:
Mbylla një kapitull të rëndësishëm të jetës sime. Koha që kalova në Televizionin Globi ishte ndër përvojat më cilësore që kam pasur, si në plan personal, ashtu edhe profesional.
Nuk jam më pjesë e shtëpisë sime të televizionit, por do ta mbaj gjithmonë me respekt atë që përjetova aty. Gjatë punës kam marrë më të mirën — kam njohur njerëz të jashtëzakonshëm, kam përjetuar sfida dhe kritikë të ndershme dhe gjithmonë kam pasur dëshirë të rritem e të përmirësohem.
Faleminderit çdo kolegu e bashkëpunëtori me të cilin pata mundësinë të punoj — nga ju mësova shumë dhe më bëtë njeri më të mirë.
Një mirënjohje e veçantë shkon për Blerim Mustafin — jo vetëm si drejtues, por si mik. Ai krijoi Globin me një mision të qartë: të kontribuojmë për shoqërinë tonë. Besoj se ia kemi dalë dhe dëshiroj që Globi të vazhdojë në atë rrugë.
Po marr një rrugë të re drejt migrimit — një vendim që ndoshta do të gjykohet, por jeta shpeshherë nuk është ashtu siç e planifikojmë. Nuk fajësoj askënd për zgjedhjen time, përkundrazi: ju uroj gjithë të mirat kolegëve të mi gazetarë — paçi sukses dhe realizim dhe ju lus juve e çdo njeri tjetër: Bëjeni këtë vend më të mirë!”, shkruan gazetari Abedin Bilalli nga Gostivari, i punësuar deri tani në TV lokal Globi.(INA)
