Kryetari i Kuvendit, Afrim Gashi ka marrë pjesë në pritjen e krerëve shtetërore në Prishtinë me rastin e 17 Shkurtit- Ditës së Pavarësisë së Kosovës.
Në këtë aktivitet, të pranishëm kanë qenë presidentja Vjosa Osmani, kryetarja e Kuvendit Albulena Haxhiu si dhe kryeministri Albin Kurti.
Sipas Gashit kjo ditë mishëron dinjitetin e një populli që e fitoi lirinë me sakrificë dhe e ndërton shtetin me vizion e përgjegjësi.
“Me ftesë të krerëve shtetërorë, presidentes Vjosa Osmani, kryetares së Kuvendit Albulena Haxhiu dhe kryeministrit Albin Kurti, në Prishtinë, pata nderin të marr pjesë në pritjen shtetërore me rastin e Ditës së pavarësisë së Republikës së Kosovës; një mbrëmje me solemnitet shtetëror dhe emocione të thella kombëtare. Kjo ditë mishëron dinjitetin e një populli që e fitoi lirinë me sakrificë dhe e ndërton shtetin me vizion e përgjegjësi”, ka thënë Gashi.
Në frymë respekti dhe besimi të ndërsjellë, ai ka riafirmuar përkushtimin për thellimin e bashkëpunimit ndërmjet dy vendeve, “në shërbim të paqes, stabilitetit dhe së ardhmes sonë të përbashkët evropiane”.
“Në emër të shqiptarëve të Maqedonisë së Veriut, përcolla urimet më të përzemërta për këtë ditë të shënuar, si dhe ndjenjën e afërsisë e dashurisë vëllazërore për popullin dhe shtetin e Kosovës”, nënvizon kryeparlamentari Gashi.
