Ganiu i përgjigjet Osmanit: Çairi nuk ka vota për karrieristë të dalldisur

Kryetari i Komunës së Çairit, Visar Ganiu, ka reaguar ndaj kandidatit të BDI-së për Çairin, Bujar Osmani, duke e akuzuar se fushatën e tij për zgjedhjet e 19 tetorit e ka nisur në mënyrë “klandestine dhe me video klipe boshe ku dominon heshtja”. Sipas Ganiut, këto paraqitje dëshmojnë se Osmani është “i huaj për Çairin, një karrierist i vetmuar që udhëhiqet nga maksima ‘qëllimi i arsyeton mjetet’ dhe që për ambicie personale është në gjendje të shkelë mbi njerëz”. Në një deklaratë të gjatë, Ganiu ka listuar disa akuza ndaj Osmanit dhe partisë që ai përfaqëson: Izolimi politik i Çairit: “Derisa ti ndërtoje karrierën personale me foto me zyrtarë botërorë, Çairi mbijetonte i ngujuar në karantinën politike ku e izoloi partia jote.” Sabotimet nga qeveria: “Shefi yt i arratisur nga drejtësia, Artan Grubi, bënte çmos që asnjë projekt e asnjë donacion të mos arrinte në Çair.” Shfaqja e Çairit si ‘Kandahar’: “Ti dhe bashkëpunëtorët tuaj bëtë fushata që ta paraqitni Çairin si vend kaotik, vetëm për ta dobësuar politikisht.” Truqet e marketingut: “Ndërsa ti bëje foto me sanduiçe nëpër aeroporte për të na bindur se punon për shtetin, administrata e Çairit punonte çdo ditë për hallet e qytetarëve.” Ganiu tha veç se ekziston në komunë “Tabela të turpit të Qeverisë” ku janë të evidentuar të gjitha sabotimet dhe obstruksionet e ushtruara ndaj Çairit nga qeveria e kaluar. Në fund, ai i kujtoi Osmanit festimet me “valixhe dhe muzikë” që, sipas tij, Artan Grubi dhe bashkëpunëtorët e tij organizuan para komunës vitin e kaluar: “Mbuloji veshët, Bujar, dhe mos gënje popullin me truqe marketingu. Çairi ka nevojë për menaxherë të suksesshëm, jo për karrieristë të dalldisur që luajnë futboll në zyrat e paguara me paratë e qytetarëve. Prandaj, Çairi nuk ka vota për ty.”