Fronti Europian drejt zhbërjes së plotë. Dy javë pasi kryesia e Aleancës për Shqiptarët e drejtuar nga Ziadin Sela njoftoi se largohen nga koalicioni me Ahmetin dhe se do të veprojnë si grup në vete, deputeti i këtij subjekti politik Ilir Demiri ka njoftuar kreun e Kuvendit Afrim Gashin se ai do të veprojë si deputet i pavarur.
Ky veprim i tij, hap dyshime nëse ai është larguar edhe nga partia e tij Aleanca për Shqiptarët. I kontaktuar nga Alsat, ai sot nuk deshi të flasë për veprimin e tij. Tha se të gjitha detajet do t’i sqarojë gjatë ditës së nesërme.
As nga Aleanca për Shqiptarët sot nuk deshën të komentojnë veprimin e deputetit Ilir Demiri. Burime brenda këtij subjekti citojnë sqarimet që Demiri i ka bërë në parti
“Unë jam deputet i pavarur por përfaqësoj ideologjinë dhe programin e Aleancës për Shqiptarët” citohet të ketë thënë deputeti Ilir Demiri.
Shumica parlamentare për momentin përballet me mungesë të badenterit për ligjet më të rëndësishme të cilat miratohen me shumicë të dyfishtë. Tkurrja e Frontit Evropian mund të ndihmojë shumicën që të sigurojë badenter. Nuk dihet se a do t’i japë votën në badenter mazhorancës edhe deputeti tanimë i pavarur Ilir Demiri.
Pas largimeve të njëpasnjëshme nga Fronti Europian, koalicioni i drejtuar nga BDI mbetet me 12 deputetë ndërsa partia e Ahmetit mbetet me vetëm 10 deputetë.
Kjo ishte përbërja e deputetëve të Frontit Europian që doli nga zgjedhjet e fundit parlamentare që grumbulluan 18 deputetë
Frontin e braktisën:
Menduh Thaçi i PDSH-së, Bejxhan Iljas nga Partia Demokratike Turke, dhe së fundmi katër deputetët e ASH-së, Ziadin Sela, Ilire Dauti, Elmi Aziri dhe Ilir Demiri.
Për momentin brenda Frontit kanë mbetur vetëm deputetët Sali Murat dhe Skender Rexhepi të cilët deri tani nuk kanë paralajmëruar largim të mundshëm nga Fronti por një gjë e tillë nuk përjashtohet në të ardhmen.
Ndërkohë tre deputetët e ASH-së së Taravarit pas largimit nga VLEN, funksionojnë në opozitë në bashkëpunim me BDI-në, por eksponentët e këtij krahu politik thonë se edhe ky bashkëpunim do të varet nga rezultati i zgjedhjeve të përsëritura lokale më 11 janar në katër komuna./Alsat.mk
