Ankth dhe frikë për Rei Manaj. Sulmuesi shqiptar pësoi një dëmtim të rëndë në sfidën e së dielës në Superligën e Turqisë, ndërsa pasi humbi ndjenjat në fushë, u dërgua me ambulancë në spital.
Por futbollisti u shfaq i vetëdijshëm në momentin kur po shoqërohej nga stafi mjekësor për ndihmë dhe teste të specializuara që do të zbulojnë shkallën e dëmtimit.
Ishte minuta e tretë e sfidës mes Sivaspor dhe Goztepe, kur pas një përplasje në zonë me mbrojtësin rival, Manaj ra keq në fushë.
Shokët e skuadrës e kuptuan menjëherë se bëhej fjalë për diçka serioze, ndërsa e shpejtë ishte ndërhyrja e stafit mjekësor që i dha edhe ndihmën e parë.
Mes ankthit, sulmuesi kuqezi u largua nga fusha me ambulancë, për t’u dërguar në spitalin e qytetit.
Më pas pamjet e publukuara nga medit turke, ku Manaj shfaqet i vetëdijshëm larguan frikën, por vetëm testet e thelluara mjekësore do të tregojnë dëmtimin dhe shkallën e tij.
Po ashtu, ato do të përcaktojnë edh periudhën e rikuperimit për këtë lëndim, që vjen vetëm një javë nga nisja e grumbullimit të kombëtares për ndeshjet e para në kualifikueset e “Botërorit 2026”.
