Kryetari i Bogovinës mirëpret euroambasadorin Rokas, projekti i përkrahur nga BE dëshmi e përkushtimit të përbashkët për zhvillim
Kryetari i Komunës së Bogovinës, Feti Abazi mirëpriti në vizitë njëditore Ambasadorin e Bashkimit Europian, Michalis Rokas, i cili u njoh nga afër me projektet në realizim dhe prioritetet zhvillimore të kësaj komune.
Në kuadër të vizitës u realizua edhe inspektimi i projektit të përkrahur nga Bashkimi Europian, i cili paraqet dëshmi konkrete të mbështetjes së vazhdueshme të BE-së për Komunën e Bogovinës dhe përkushtimit të përbashkët për zhvillim të qëndrueshëm.
Gjatë takimit të hapur u trajtuan sërë temash me interes për qytetarët, si dhe u prezantuan prioritetet për mandatin katërvjeçar të Kryetarit të Komunës. Ndër prioritetet kryesore u theksuan zgjidhja e çështjes së furnizimit me ujë të pijshëm, zhvillimi i turizmit malor dhe përkrahja e bizneseve lokale, me qëllim forcimin e ekonomisë lokale dhe rritjen e mirëqenies së qytetarëve.
Në kuadër të agjendës, Ambasadori zhvilloi gjithashtu takim të frytshëm me përfaqësues të shoqërisë civile, ku u diskutuan çështje me rëndësi për zhvillimin lokal dhe bashkëpunimin e mëtejmë me Bashkimin Europian.
Nga Komuna e Bogovinës u shpreh mirënjohje për mbështetjen e deritanishme të Bashkimit Europian, me shpresën se bashkëpunimi i ndërsjellë do të vazhdojë dhe do të thellohet edhe më tej në të ardhmen.
