Zëvendëskryeministri Arben Fetai në një paraqitje televizive në emisionin ZOOM në TVM2 ka theksuar se ish bashkëpartiaku i tij Ziadin Sela është transformuar në patericë të BDI-së. Ai thotë se qytetarët e shohin këtë, dhe se i njëjti ka humbur çdolloj legjitimiteti që mund të ketë patur në të kaluarën.
“Për Ziadin Selën, më vjen keq transformimi i atij njeriu. Më vjen keq se deri në çfarë mase ka degraduar duke sulmuar me një gjuhë të ulët në vazhdimësi, bashkëpunëtorë, njerëz shumë të afërt, miq për vite e vite me radhë, veçanërisht doktor Arben Taravarin. Besoj këtë e kanë parë edhe qytetarët, janë dëshmitarë të transformimit të zotëriut në fjalë i cili realisht ka humbur çdolloj legjitimiteti që mund të ketë patur në të kaluarën duke vendosur të bëhet patericë e BDI-së dhe argat të atij të cilët e kishte akuzuar për tentim për ta eliminuar fizikisht. Është për keqardhje, por kjo është në ndërgjegjen e tij”, ka theksuar zëvendëskryeministri Arben Fetai.
