Në Ditën ndërkombëtare kundër korrupsionit, më 9 dhjetor, festojmë jo vetëm një ditë simbolike, por një thirrje globale për veprim të vendosur kundër korrupsionit që pengon zhvillimin dhe sundimin e ligjit në rajonin tonë. Si Qeveri e Republikës së Maqedonisë së Veriut, ne e trajtojmë luftën kundër korrupsionit si politikë të qëndrueshme shtetërore, e bazuar në rezultate të matshme dhe jo në premtime boshe. Qytetarët tanë meritojnë institucione transparente, rikthim të pasurisë së vjedhur dhe sisteme digjitale që e bëjnë korrupsionin të pamundur, ka thënë zëvendëskryeministri për qeverisje të mirë, Arben Fetai.
Postimi i plotë:
Sot shënojmë Ditën Ndërkombëtare Kundër Korrupsionit, ditë që thekson se integriteti institucional është parakusht për funksionimin e shtetit dhe standard që nuk mund të negociohet.
Siç kam theksuar edhe në Konferencën Globale të OKB-së, korrupsioni nuk luftohet me intuitë apo deklarata. Luftohet me fakte, me sisteme funksionale, me vigjilencë institucionale dhe me standarde të qarta që nuk varen nga ndryshimi i qeverive.
Për ne, kjo betejë nënkupton forcimin e mekanizmave të kontrollit dhe transparencës, matjen e rreziqeve të korrupsionit me metodologji moderne, ndërtimin e institucioneve që janë më të forta se individët dhe mbylljen e çdo hapësire ku abuzimi mund të ndodhë.
Andaj, si Zëvendëskryeministër për Qeverisje të Mirë dhe si kryetar i Trupit ndër resor për koordinimin e aktiviteteve kundër korrupsionit dhe i Këshillit nacional për hetime financiare dhe konfiskim të pasurisë, angazhimi im mbetet të ndërtojmë sisteme që e parandalojnë korrupsionin dhe mekanizma që e bëjnë të pamundur mbajtjen e pasurisë së fituar padrejtësisht.
Në thelb, lufta kundër korrupsionit është betejë për cilësinë e demokracisë sonë, për një shtet ku rregullat vlejnë për të gjithë, ku integriteti institucional është normë dhe ku e ardhmja ndërtohet mbi besim e jo mbi tolerim të abuzimit.
