Në Silicon Valley, zemra e inovacionit botëror, po zhvillohet një projekt që ka tronditur botën shkencore dhe etike.
Sipas Wall Street Journal, kompania e re Preventive, e themeluar në San Francisco në maj, po punon për modifikimin gjenetik të embrioneve njerëzore me qëllimin për të parandaluar sëmundjet e trashëguara.
Pas kësaj nisme qëndrojnë emra të njohur të teknologjisë si Sam Altman, drejtori ekzekutiv i OpenAI, dhe Brian Armstrong, CEO i Coinbase. Por ajo që ka ndezur debatin është mundësia që përmes kësaj teknologjie të krijohen në të ardhmen “fëmijë të personalizuar”, me prindër që mund të zgjedhin tipare fizike apo aftësi të caktuara, nga ngjyra e syve deri te inteligjenca.
Edhe pse modifikimi i embrioneve njerëzore është i ndaluar në SHBA dhe Europë, kërkimet mbi analizat gjenetike po avancojnë me ritme të shpejta. Sipas ekspertëve, këto teknologji mund të shkojnë përtej parandalimit të sëmundjeve, duke u kthyer në një formë të re seleksioni gjenetik.
“Po rrezikojmë të futemi në një epokë ku lindja nuk është më natyrale, por një produkt tregu,” paralajmëron një nga shkencëtarët e cituar nga WSJ.
Kombinimi i inteligjencës artificiale me bioteknologjinë po hap një treg të ri për startup-et që ofrojnë shërbime të avancuara të “zgjedhjes gjenetike”. Investitorët e mëdhenj të Silicon Valley po shohin mundësinë e krijimit të një “njeriu të përmirësuar”, ndërsa kritikët paralajmërojnë për ndarje të reja sociale, ku vetëm të pasurit do të kenë akses në “cilësi gjenetike superiore”.
Debati sapo ka nisur, por një gjë është e sigurt: me teknologjinë që ecën më shpejt se ligjet, kufiri mes inovacionit dhe etikës po bëhet gjithnjë e më i paqartë.
