Në një hap të jashtëzakonshëm për të ardhmen e klubit dhe futbollit në Ballkan, FC Shkupi ka zyrtarizuar sot një marrëveshje madhore bashkëpunimi me “Royal Business Council”, një prej institucioneve më me ndikim ekonomik, diplomatik e sportiv në rajonin e Gjirit, që vepron nën kujdesin dhe mbështetjen e Familjeve Mbretërore të Dubait dhe Emirateve të tjera të Bashkuara Arabe.
Kjo marrëveshje e nivelit të lartë, e nënshkruar nga Presidenti i “Royal Business Council”, Dr. Süleyman Tasci, dhe Presidenti i FC Shkupit, Yasin Konyali, hap dyert për një partneritet që synon ngritjen e FC Shkupit në nivelet më të larta të futbollit ndërkombëtar, por njëkohësisht sjell edhe një filozofi të re në zhvillimin e talenteve të rinj në Ballkan.
Në një deklaratë për faqen zyrtare të klubit, partneri i ri i i klubit, Dr. Süleyman Tasci theksoi se ky bashkëpunim nuk është një marrëveshje e zakonshme, por një projekt shumëdimensional që përfshin futbollin, edukimin, diplomacinë sportive dhe zhvillimin ndërkombëtar.
“Ne nuk po krijojmë thjesht një bashkëpunim sponsorial. Ne po ndërtojmë një vizion të madh, një platformë që merr frymëzim nga modelet evropiane dhe botërore. Synojmë të krijojmë një rrjet klubesh vëllazërore dhe akademish në Dubai, Abu Dhabi, Doha, Riad e deri në Shkup, që të përgatisim brezin e ardhshëm të yjeve të futbollit nga Ballkani për skenën ndërkombëtare. FC Shkupi do të jetë qendra e këtij projekti në Ballkan, me përkrahjen e plotë të Royal Business Council dhe investitorëve nga vendet e Gjirit.” është shprehur Tasci.
Ai gjithashtu theksoi rëndësinë e lidhjes mes universiteteve dhe shkëmbimit kulturor përmes sportit, duke e quajtur këtë projekt një “diplomaci të re sportive që bashkon popujt përmes edukimit dhe pasionit për futbollin.”
Nga ana tjetër, presidenti i klubit, Yasin Konyali u shpreh se kjo është dita kur FC Shkupi hyn zyrtarisht në një epokë të re:
“Ky është një moment historik për klubin tonë. Për ne, kjo marrëveshje është një hap strategjik drejt profesionalizimit të plotë të akademisë dhe klubit në tërësi. Po ndërtojmë ura mes Ballkanit dhe botës arabe, mes Shkupit dhe Dubait, dhe mbi të gjitha, po i japim mundësi rinisë sonë që të ëndërrojë dhe të arrijë lartësitë. Në vitin 2027, FC Shkupi do të festojë 100-vjetorin. Ne duam që atë vit të hyjmë në historinë e futbollit si një klub që ka ndryshuar rrënjësisht, që ka struktura moderne, akademi profesionale dhe prani në arenën ndërkombëtare. Kjo marrëveshje është çelësi drejt asaj ëndrre” ka thënë Konyali.
Çfarë përfshin marrëveshja?
• Ndërtimin e një akademie profesionale futbolli në Shkup, me standarde europiane.
• Trajnime të ndërsjella për trajnerë dhe staf teknik.
• Bursa dhe shkëmbime për lojtarë të rinj me akademi dhe universitete në Emiratet e Bashkuara, Katar, Arabinë Saudite, etj.
• Ndërtimin e partneriteteve me klube elitare në Lindjen e Mesme dhe Evropë, për zhvillimin e talentëve dhe ndarjen e përvojës teknike.
• Përgatitje për 100-vjetorin e FC Shkupit me projekte të veçanta sportive dhe kulturore.
• Zhvillimin e një rrjeti klubesh dhe qytetesh vëllazërore në rajon dhe në Lindjen e Mesme.
• Hapjen e përfaqësisë zyrtare të “Royal Business Council” në Shkup, si pikë qendrore për bashkëpunime dhe projekte ndërkombëtare.
Ky partneritet i jashtëzakonshëm është shumë më tepër se një marrëveshje biznesi, është një vizion afatgjatë që forcon sportin, lidh kombet dhe krijon një identitet të ri ndërkombëtar për FC Shkupin. Përveç futbollit, “Royal Business Council” ka paralajmëruar edhe investime të tjera strategjike në Maqedoni, që do të prekin fusha si edukimi, teknologjia dhe zhvillimi ekonomik, duke e parë vendin si një nyje të rëndësishme për projektet afatgjata në rajon. Gjithashtu, në kuadër të këtij bashkëpunimi, do të nisë projekti i përbashkët “Royal Akademi”, një iniciativë e re për ndërtimin e një platforme edukimi dhe zhvillimi sportiv, e cila do të lidhë akademinë e FC Shkupit me institucionet partnere në Lindjen e Mesme dhe Evropë, duke krijuar mundësi konkrete për gjeneratat e reja të rajonit.
