Kandidati i VLEN për Kërçovën, Fatmir Limani ka prezantuar programin për zhvillimin e Kërçovës të firmosur solemnisht me 400 të rinj.
Në një atmosferë solemne por edhe mobilizuese ai dhe ekipi i tij i kandidatëve për Këshillin komunal paraqitën para 400 të pranishmëve të rinj programin e tij dhe bashkëbisedoi me ta.
Aktiviteti nisi me një pasqyrim të shkurtër të dështimeve 12 vjeçare të politikanëve paraardhës me sqarimin e moderatorit: “ne nuk shajmë askënd, por ne shohim përpara”.
Bartësja e listës, Teuta Ahmeti Purellku, madje bëri thirrje për lindje të shpresës, nëpërmjet punës dhe përgjegjësisë.
Ndërkaq, ministri Limani fjalimin e tij e filloi me një përkushtim për minoritetet rome, turke, apo bashkëqytetarët maqedonas, të cilëve ju drejtua dhe në gjuhën e tyre.
Më pas ai duke ju referuar të kaluarës së dhimbshme të babait të vet, tha “unë nuk dua të merrem më lëvdata për të kaluarën, apo kujtime të heronjve, por të shohim nga e ardhmja, se si të bëjmë Kërçovën të jetueshme”. Ai ilustroi programin për rininë, që parashikon 1% të buxhetit, afro 200 mijë euro, për projekte rinore dhe 5000 euro për hapjen e biznesit të një të riu.
“Duke bashkëpunuar me të rinjtë të mundësojmë që shtëpitë e braktisura të kenë dritë që rajoni i Kërçovës që është i bekuar, të përparojë”, tha ai.
Në fund ai nënshkroi me të pranishmit kontratën e ndryshimit të Kërçovës së dekadave që do të vijnë.
