Kandidati për kryetar të komunës së Kërçovës nga radhët e VLEN, Fatmir Limani tha se sot ndjejmë fuqinë tuaj në këtë sallë, një vit e gjysmë më parë, siç tha, “na besuat përgjegjësinë më të madhe apo rotacionin e partive shqiptare në pushtet”.
“Ja ku jemi, shumicë që kërkon ndryshimin e liderëve, mendësisë, drejt kombit modern, kombit të qytetëruar. Kjo shumicë është rinia, janë gratë, mërgata, janë ata që duan vërtetë Evropën. Kjo shumicë është shumicë për integrim, por ajo nuk ka asgjë të përbashkët me liderin që krahasohet me zogjtë në këtë periudhë të frikësimit nga realiteti ekzistues”, tha Limani.
Ai tha se ka përfunduar periudha e vitit 2001 dhe tani kërcasin lapsat e gjeneratës më të re e cila është më e aftë se ne.
“Për 25 vite pushtet ata (opozita) ishin gojën plot me integrime, ndërkohë që dëbuan djemtë më të mirë të atdheut tonë”, u shpreh Limani.
Është e vërtetë, thekson ai më tej, se skifterit i duket vetja shqiponjë, por njeriu nuk duhet të karakterizohet me virtyte shpezarake.
“Skifteri nuk ngritët kur lart për dritë dhe bashkim, ai digjet, shkatërron, kërkon konflikt, në politikë ai paraqet dhunë, fyerje dhe tension”, tha ai.
Ai me një këshillë deri te opozita, konkretisht te BDI se duhet të drejtohet nga një politikan i matur, durimtar dhe vizionar.
“Nuk kemi frikë, nuk hyjmë në referendum kundër një etnie tjetër, hyjmë në referendumin e qeverisjes së mirë dhe të jeni të bindur se do ta fitojmë këtë referendum, me vizoinin për zhvillim, duke kthyer jetën dhe gjallërimin në shtëpitë tona të braktisura”, ka thënë mes tjerash Limani.
Fatmir Limani: Kjo shumicë është për integrim, nuk ka asgjë të përbashkët me liderin që krahasohet me zogjtë
