Maqedoni

Familjarët kërkojnë të rihapet hetimi për zjarrin në spitalin modular të Tetovës

Njëri nga familjarët e të vdekurve në Spitalin Modular në Tetovë, Mumin Ismaili, kërkoi nga kryeprokurori, Lupço Kocevski, që të rihapet hetimi për spitalin modular në Tetovë dhe procedura gjyqësore të zhvillohet, siç thotë Ismaili, pa ndikim partiak ose të biznesit.

Ismaili kërkon që ekspertiza gjermane të jetë si provë kyçe në këtë hetim dhe fajtorët të marrin dënimin e merituar.

“Si familjarë të viktimave kërkojmë nga ju që të rihapet hetimi për të gjithë fajtorët e vërtetë të zjarrit në Spitalin Modular në Tetovë, të formoni një ekip të pavarur që do të shqyrtojë të gjitha aspektet e rastit, përfshirë edhe zvarritjen eventuale të procedurës nga prokurorët. Të garantoni se procedura gjyqësore do të zhvillohet pa ndikim partiak apo të biznesit. Të siguroni transparencë dhe përgjegjësi në punën tuaj. Ekspertiza gjermane të jetë si provë kyçe në këtë hetim. Ne nuk do të heshtim, do të vazhdojmë të flasim për të dashurit tanë që i humbëm.”, – theksoi familjari i viktimave të modularit, Mumin Ismaili.

Javën e kaluar në Tetovë u protestua para Gjykatës Themelore të Tetovës, për shkak të mos sjelljes së drejtësisë për këtë rast. Ky reagim erdhi të enjten pak minuta para se të fillojë seanca e rigjykimit për zjarrin në Spitalin Modular, e cila po zhvillohet në Gjykatën e Tetovës.

Në këtë rast akuzohen ish-drejtori mjekësor i spitalit, Florin Besimi, ish-drejtori ekonomik, Artan Etemi, dhe spitali i Tetovës si person juridik. Besimi dhe Etemi akuzohen për veprën penale “Krime të rënda kundër sigurisë publike”, ndërsa IShP Spitali Klinik i Tetovës, për veprën penale “shkaktim i rrezikut të përgjithshëm”.

Rasti rigjykohet pasi Gjykata e Apelit të Gostivarit e ka kthyer lëndën në Gjykatën Themelore në Tetovë.

Related Posts