Fakulteti Filozofik i UT-së organizoi tryezë të rrumbullakët me temë: “Afirmimi i sociologjisë dhe roli i sociologut në shoqëri”

Në Fakultetin Filozofik të Universitetit të Tetovës, më 23 prill 2025, u mbajt tryezë e
rrumbullakët me temë "Afirmimi i sociologjisë dhe roli i sociologut në shoqëri". Kjo tryezë e rrumbullakët vjen si iniciativë e përbashkët e Universitetit të Tetovës dhe Universitetit “Kirili dhe Metodi” nga Shkupi. Qëllimi kryesor i tryezës është të nxisë diskutim rreth rëndësisë së sociologjisë si disiplinë shkencore dhe ndikimit që sociologët mund të kenë në transformimin e shoqërisë moderne.
Shefja e programit studimor Sociologji, Prof. Dr. Ardita Abduli – Reka tha se qëllimi i kësaj
tryeze është afirmimi i sociologjisë si shkencë dhe roli i sociologut në shoqëri. "Ne si katedër e Sociologjisë pranë Universitetit të Tetovës në bashkëpunim me katedrën e Sociologjisë pranë Universitetit Kirili dhe Metodi dalim me opinion të hapur për t’i treguar opinionit dhe të rinjve sepse sociologjia është e nevojshme të vazhdojë të jetë në këndin e lëndëve obligative dhe pse sociologjia duhet të studiohet nga ana e të rinjve. Është e vetmja shkencë, e cila jep shpjegim në mënyrë unike për një sërë dukurish shoqërore dhe probleme të ndryshme, duke ofruar një gamë të gjerë mekanizmash për zgjedhjen e tyre. Sociologjia është një shkencë e cila mbulon të gjitha shkencat tjera sepse pjesë kryesore e studimit të saj është shoqëria. Në anën tjetër e kemi edhe rolin e sociologut në shoqëri, i cili bart në vete një mision human dhe përpos që ndjek sjelljet njerëzore në ndërveprim, ofron edhe mjaft mekanizma të tjerë për mirëqenien e përgjithshme të shoqërisë."–
tha mes tjerash shefja e programit studimor Sociologji, Prof. Dr. Ardita Abduli – Reka.
Shefi i programit studimor Sociologji në Fakultetin Filozofik të Universitetit “Kirili dhe
Metodi’, Prof. Dr. Ilo Trajkovski tha se është i kënaqur që vjen në Universitetin e Tetovës dhe shpreson se bashkëpunimi mes dy institucioneve do të thellohet akoma më shumë. Ai u shpreh se në këtë tryezë të rumbullakët diskutohet për afirmimin e sociologjisë dhe ndikimin e sociologjisë në shoqërinë bashkëkohore, pasi si profesion shpeshherë neglizhohet dhe ata janë sot këtu për ta mbrojtur këtë profesion, pasi është shumë i rëndësishëm në integrimin e shoqërisë sonë.
Dekani i Fakultetit Filozofik, Prof. Dr. Ibish Kadriu tha se sfidat aktuale në fushë të
afirmimit të dijes së sociologjisë në mesin e brezit të ri të studentëve në të dy këto universitete janë imperativisht të përbashkëta, ndaj edhe ndajmë mendimin e përbashkët se këto sfida kërkojnë krijimin e një sinergjie konkrete për të bërë hapa bashkëpunimi institucional, si forma më efektive për ta vënë atë sinergji profesionale në dobi të brezit studentor aktual dhe të ardhshëm të të dy universiteteve. “Në dobi të pozitivizimit të studimeve dhe hulumtimeve sociologjike në drejtim të efektuimit të kësaj dobie në hapjen e një paradigme sociologjike që i jep drejtim të qartë rolit të fushave sociologjike të evoluimit pozitiv të shoqërisë sonë të përbashkët, në evoluimin pozitiv drejt
sfidave moderne, evropiane të shoqërisë sonë. Konsideroj me bindje se një pozitivizim i evoluimit modern të shoqërisë sonë mund të arrihet me një efektivitet konkret vetëm përmes aktualizimit dhe fuqizimit të rolit të studimeve dhe hulumtimeve sociologjike, duke e njohur faktin shumë të hershëm në historinë e shoqërisë njerëzore dhe faktin aktual se sociologjia është dija që merret me fenomenet shoqërore në plan shumëdimensional, dija që bën diagnostikimin empirik të atyre fenomeneve dhe fakteve sociologjike, por që është dija që është e kualifikuar, që u jep, pra, legjitimitet zgjidhjeve pozitive që u jep rrjedhave të fenomeneve shoqërore në zierje brenda një shoqërie. Ne konsiderojmë bashkërisht se takimi i sotëm është guri themeltar që do pozitivizojë një bashkëpunim të nevojshëm për t’u dalë përpara sfidave që na vë përpara në angazhimin tonë universitar për t’i dhënë dije, njohuri, interes dhe vullnet edhe brezit të ri që të afirmohen si protagonistë të zhvillimeve më të pozitivizuara në evoluimin e shoqërisë sonë drejt vlerave shoqërore që shoqërinë tonë do ta afirmojë në nivelin që e meriton dhe që do të mund t’i japë një dinjitet njerëzor që e meriton.” – tha mes tjerash dekani i Fakultetit Filozofik, Prof. Dr. Ibish Kadriu.
Pikëpamjet e tyre lidhur me këtë temë i shpalosën edhe profesori nga katedra e Sociologjisë, Prof. Dr. Abdylnaser Sinani dhe profesori nga Universiteti Kirili dhe Metodi, Prof. Dr. Zoran Matevsi.
Në këtë tryezë, fokus të veçantë iu kushtua sfidave aktuale me të cilat përballen sociologët
në tregun e punës dhe mundësitë për të forcuar pozicionin e tyre në institucionet akademike dhe sociale në vend. Gjatë diskutimeve, pjesëmarrësit theksuan nevojën për një qasje më proaktive në adresimin e problematikave shoqërore, si dhe rëndësinë e hulumtimeve sociologjike në hartimin e politikave publike. Pjesëmarrësit shprehën kënaqësinë për organizimin e këtij eventi dhe nevojën për më shumë aktivitete të tilla, që krijojnë ura bashkëpunimi ndëruniversitar dhe nxisin debate në fushën e shkencave shoqërore.