Fakulteti Filozofik i Universitetit të Prishtinës e ka shënuar sot 65-vjetorin e themelimit, si institucioni më i vjetër dhe udhëheqës në fushën e shkencave shoqërore dhe humane në Republikën e Kosovës.
Në këtë përvjetor të rëndësishëm morën pjesë personalitete të larta akademike, ndër të cilët edhe Rektori i Universitetit të Tetovës, Prof. Dr. Jusuf Zejneli, Dekani i Fakultetit Filozofik, Prof. Dr. Kushtrim Ahmeti, si dhe profesorët e kësaj njësie akademike, Prof. Dr. Ibish Kadriu dhe Prof. Dr. Zeqirja Idrizi.
Në fjalën e tij përshëndetëse, Rektori Prof. Dr. Jusuf Zejneli theksoi rolin e jashtëzakonshëm të Fakultetit Filozofik në arsimimin e brezave dhe në zhvillimin e mendimit shkencor e shoqëror në mbarë hapësirën shqiptare. Ai njëkohësisht vlerësoi ndihmën vëllazërore që profesorët e Universitetit të Prishtinës i kanë dhënë Universitetit të Tetovës, veçanërisht në vitet e para të themelimit të tij, në vitin 1994.
“Në emër të Universitetit të Tetovës, shpreh urimet më të sinqerta dhe vëllazërore për këtë përvjetor të 65-të, ku ju shënoni veprimtarinë e bujshme të Fakultetit Filozofik, kontributi i të cilit shtrihet përtej Republikës së Kosovës, gjithandej ku frymon populli ynë. Njëherazi, ju shpreh mirënjohjen tonë për kontributin e çmuar që kanë dhënë kuadrot tuaja për Universitetin e Tetovës. Universiteti i Prishtinës dhe Universiteti i Tetovës, në
rrugëtimin e tyre, janë përballur me shumë sfida, por falë përkushtimit dhe sakrificës së pedagogëve dhe studentëve, sot kanë arritur nivele konkurruese me universitete prestigjioze në rajon dhe më gjerë”, u shpreh Rektori i Universitetit të Tetovës.
Në këtë përvjetor u vlerësua kontributi shumëvjeçar i Fakultetit Filozofik të Universitetit të Prishtinës në ngritjen e arsimit, kulturës dhe mendimit akademik.
Fakulteti Filozofik i Universitetit të Prishtinës e shënoi 65-vjetorin e themelimit, Rektori i UT-së Prof. Dr. Jusuf Zejneli, e vlerësoi kontributin shumëvjeçar që shtrihet përtej Kosovës
