Shteti nuk do të mbetet pa mazut as pas përfundimit të gjendjes së krizës. Nga EMV për Alsat thonë se situata do të stabilizohet. Sipas EMV-së tërheqja e një pjese të rezervave shtetërore, së bashku me sasitë që furnizuesi i energjisë nga Greqia i dërgon, do të vazhdojë rregullisht edhe në periudhën e ardhshme.
“Aktivizimi i këtyre rezervave do të mundësojë që TEC Manastir dhe TEC Oslomej të vazhdojnë punën me kapacitet të përshtatur në përputhje me nevojat e furnizuesit universal EVN Home. Ndërkohë, EMV do të tërheqë mazut nga rezervat shtetërore vetëm në përputhje me nevojat dhe në periudhën e ardhshme nuk pret sfida lidhur me furnizimin e rregullt me energjensë, pavarësisht sa do të zgjasin bllokadat në kufirin jugor”, njoftojnë nga SH.A. EMV.
LSDM akuzon se shpallja e gjendjes krizë nuk është për shkak të protestave në Greqi, por, siç thonë për shkak të tenderëve kriminalë dhe paaftësisë së pushtetit në sektorin energjetik.
“Rritja e çmimit të energjisë elektrike dhe shpallja e gjendjes së krizës nuk janë për shkak të protestave në Greqi, por për dy arsye të lidhura drejtpërdrejt me Qeverinë – tenderët kriminalë dhe paaftësia në sektorin energjetik. Vetëm për një vit e gjysmë, me Bozhinovskën në krye të këtij sektori, Qeveria e ka çuar EMV-në drejt kolapsit financiar dhe prodhues”, deklaroi Aleksandar Sasha Dimitrijevik – Sekretar i Përgjithshëm i LSDM-së.
VMRO-DPMNE-ja thotë se LSDM-ja e ka çuar në kolaps dhe e ka plaçkitur sektorin energjetik.
“Për ta, biznes fitimprurës janë në tenderët kriminalë që LSDM-ja, përmes drejtuesve të tyre në kompanitë energjetike, i manipulonte, për çka mbi 50 zyrtarë të tyre kanë kallëzime penale, mes tyre edhe Vasko Kovaçevski, i cili është në arrati me paratë e vjedhura. Nga i gjithë ky zinxhir tenderësh kriminalë nuk mungon as kryetari i LSDM-së, Venko Filipçe”, njoftojnë nga VMRO-DPMNE.
Bllokadat nga fermerët grekë në pikat kufitare, të cilat zgjasin prej javësh, e kanë vështirësuar ndjeshëm furnizimin e rregullt me mazut. Për këtë arsye, javën e kaluar EMV kërkoi nga Qeveria të shpallë gjendje krizë, në mënyrë që të mund të përdoren rezervat shtetërore dhe të shmangen ndërprerjet në procesin prodhues. /Alsat.mk
